আবোওয়াঃ ওয়েব পেজ- দিল্লী সাহিত্য অ্যাকাডেমি পাহটা খন এম চাল লৗগিদঃ কানায় ২০২০ সাল রেনাঃ সাহিত্য অ্যাকাডেমি শিরপৗ। নোওয়া শিরপৗ ঞাম লৗগিৎ নে-হালেগে ঞুতুম হঁ সাহিত্য অ্যাকাডেমি পাহটা খন লৗই সাডে হোয় আকানা। ওনকো মুদরে সাহিত্য অ্যাকাডেমি শিরপৗয় ঞাম এদা রূপচাঁদ হাঁসদা। উনিয়াঃ অনড়হেঁ পুঁথি “গুড় দাঃ কাসা দাঃ” হতেচ্তে। নঁতে সাহিত্য অ্যাকাডেমি বাল সাহিত্য শিরপৗয় ঞাম এদা জয়রাম সরেন। উনিয়াঃ অনল “ভঁঞ্জ কুল ভুরকা ইপিল”। যাঁহাদ সুনারাম সরেন চেতান মিৎ জিয়ন অনল পুঁথি কানা। আর অঞ্জলি কিস্কু উনিয়াঃ অনড়হেঁ বিঁডৗ “আঁজলে” হতেচ্তে সাহিত্য অ্যাকাডেমি যুবা শিরপৗয় আতাং আ।
পুরুলিয়ারেন রূপচাঁদ হাঁসদা- ১৯৬২ সালরে পুরুলিয়া জেলা রেনাঃ বান্দোয়ান থানারে মেনাঃ কায়রা আতোরে রূপচাঁদ হাঁসদা আঃ জানাম তায়। উনিদ চাকরি সুবৗদতে খড়্গপুর রেগে তাঁহেনায়। মানতান হাঁসদা আঃ পোয়লো অলঃ জীয়ন দ আতো ইস্কুল খনগে এহপ লেন তায়া। ইনৗতায়ম ১৯৮২ সালরে সেবা ভারতী কলেজ, কাপগাড়ী খন বি.এ. পাশ আকাদায়।
উনিয়াঃ ঞুম আনা অনল পুঁথিকো মুদরে- ঝাবারৗলি-১৯৮৯ (অনড়হেঁ), সেন দাড়েয়াঃ আঞ মেনখান চেদাঃ- ২০১৬ ( তরজমা অনড়হেঁ), গুড় দাঃ কাসা দাঃ- ২০১৮ (অনড়হেঁ), মিৎ জড় কলম ( তরজমা অনল) এমান আয়মা পুঁথিগে নিৎ ধৗবিচ্তে উছৗন আকানা।
উড়িষ্য্যারেন জয়রাম টুডু- ১৯৬৪ সালরে উড়িষ্যা রেনাঃ ময়ূরভঞ্জ জেলারে মঁসাবনী আতোরে জানাম তায়। চালাঃকান অক্তদ রাউরকেল্লা রে তাঁহেনায়। উনিয়াঃ জানাম আতো স্কুল খনগে পৌল অলঃপাড়হা এহব লেন তায়া। ইনৗতায়ম রাউরকেল্লা খন হাই স্কুল পাশ কাতে বারিপাদা কলেজ খন পাশ কাতে বারিপাদারেগে আই.টি.আই. কেদায়। ইনৗতায়ম সম্বলপুর বিশ্ববিদ্যালয় খন স্নাতকোত্তর ডিগ্রীয় পাড়হাও লেনা।
জয়রাম টুডুওয়াঃ অনল পুঁথি কো মুদ্রে সারনা ধরম বঁগা বুরু, জানাম পৗরশি আড়াং, লুগু বুরু ঘান্টা বাড়ী, বাবা তিলকা মাঝি আরহঁ আয়মা পান্ডুলিপি মেনাঃ আকাৎ তায়া।
বাঁকুড়ারেন অঞ্জলি কিস্কু- ১৯৯২ সালরে বাঁকুড়া জেলারে অঞ্জলি কিস্কুওয়াঃ জানাম তায়। উনিদ বাঁকুড়া বালিকা হাই স্কুল খন মাধ্যমিক পাশ কাতে অনাতায়ম নেতাজী কলেজ আরামবাগ হুগলী খন বি.এ. পাশ আকাদায়। অনাতায়ম বিশ্বভারতী বিশ্ববিদ্যালয় খন স্নাতকোত্তর ডিগ্রীয় পাড়হাও কাতে ২০১৭ সালরে নেট বিনিড রেহঁয় পাশ আকাদা।
উনিয়াঃ অনল পুঁথিকো মুদ্রে অনড়হেঁ থোপে “আঁজলে”, মিৎ বিত্তা (অনড়হেঁ), ইপিল (হুডিঞ কৗহ্নি)। উনিদ নিতহঁ সিলি, সার, উমুল,ভাবনা এমান সানতাড়ি সাঁওহেৎ পাথাম করে লেতাড় গে অল ইদিয়েদ্ গেয়ায়।
.webp)
