কোলকাতা সারনা ধর্ম মহা সম্মেলন রে বাদ এনাকো সানতাড়

আবোওয়াঃ ওয়েব পেজ- কোলকাতা সারনা ধর্ম মহা সম্মেলন রে বাদ এনাকো সানতাড়। বাডায় আকানা গাপা ৩ জানুয়ারী হিলোঃ কোলকাতা ইন্ডোর স্টেডিয়ামরে সারনা মহা ধর্ম সম্মেলন হোয় লৗগিদঃ কানা। অনারে ঞেল আকানা মিৎটাং হঁ সানতাড়ি সংগঠন কোওয়াঃ সেনেলেদ্‌ লেকাতে ঞুতুম বৗনুঃ আকাদা। এমন চেৎ মিৎটাং হঁ সানতাড়ি বঁগাবুরু কোওয়াঃ ঞুতুম সদর বৗনুঃ আকাদা। নোওয়া ঞেলতে আয়মা হড়গে হাহাড়া কো সদর আকাদা। অনা ইদিকাতে নিৎ আয়মা লেকান কুকলি সানতাড় সমাজ খন গে রাকাপ্‌ হিজুঃ কানা।

সৗরিগে সানতাড় কোওয়াঃ সারনা ধরম কানা তো ? আয়মা হড়াঃ তেলারেগে বাডায় আকানা বাং কানা। এনখান পছিম বাংলা রেহঁ মিৎ বার সানতাড় হড়-হপন সারনা সাগাড় কো অর বাডায়েদা সেঁগেল অভিযান ঞুতুম তে। কুকলি রাকাপ্‌ গৎ আকানা তবে চেৎ নোওয়া রেনাঃ গিরৗ সাকাম বায় ঞাম আকাদা সেঁগেল অভিযান? সারনা ধরম রেন আঃ-আয়ুরিচ্‌ সালখান মুরমু আঃ ঞুতুম এড়ে লেকাহঁ বাং অল আকানা অনা গিরৗ সাকাম রে। নঁডেহঁ কুকলি রা্কাপ্‌ আকানা তবে চেৎ সেঁগেল অভিযান রেন সানতাড় কদ বাংকো সেলেদঃ আ ? সে সারনা জালা কো ঞির সেনঃ আ কোলকাতাতে ? নওয়া হঁ কুকলি রাকাপ্‌ কানা তবে নুকুদ অকাটাঃ সারনা ধরম কোড কো খজঃ কানা ? যাঁহা সালখান মুরমুয় খজঃ কানা অনাদ আয়মা সারনা পন্থী সালাঃ অকা মিল হঁ বাং ঞেলঃ গঃ কানা মেনতেগে বাডায় আকানা।

ঞেল আকানা উড়িষ্যা আসেকাহঁ সারনা ধরম কোড রেনাঃ দাবীয় রাকাপ আকাদা। মেনখান নঁতে আরহঁ সালখান মুরমুওয়াঃ কুশপুতলা হঁক রাপাঃ এদা। উড়িষ্যা আসেকা রেন সুন্দর মোহন হেম্ব্রম সালখান মুরমু দ আদিবাসী সানতাড় বিরুধী রড় আকাদেয়ায়। চেদাঃসে সালখান মুরমু যাঁহা লেকা সারনা ধরম কাথা রে রুমঃ,বুলঃ ডাঁডম, বঁগা বুরুরে হাঁডি চডর এমান বাং চালাঃ আ কাথায় লৗই এদা অঁডে উড়িষ্যা আসেকা নোওয়া করেনাঃ কৗডরৗয় রড়দারাম আকাদা। নঁতে সেঁগেল অভিযান পাহ্‌টা খনহঁ সুন্দর মোহন হেম্ব্রম আঃ কুশপুতলা হঁক রাপাঃ আকাদা। এনহঁ বানার গে সারনা ধরম কোড কিন খজঃ কানা এনখান নেয়াম, নেমাচা্‌ আরিচৗলি দ চেদাঃ ভেগার ভেগার- নংকান কুকলি হঁ নিৎ দিশম হড় ঠেন রাকাপ্‌ কানা। ঝাড়খন্ড আসেকাহঁ উড়িষ্যা আসেকা লেকা সালখান মুরমুওয়াঃ নাওয়া সারনা ধরম নেয়াম রেনাঃ কাথা কো বিরুধ এদা। সালখান মুরমুহঁ উড়িষ্যা আসেকা,ঝাড়খন্ড আসেকা, মাঝি পারগানা মহল এমান এমান সানতাড় সংগঠন বিরুধরে আয়মা লেকান কাথায় রড় এদা।

নঁতে কোলকাতারে যাঁহা সারনা ধর্ম মহাসম্মেলন হুয় লৗগিদঃ কানা অঁডে- জয় সিং বোঙ্গা, জয় ধরতিমাতা, জয় প্রকৃতিমাতা, জয় সারনা, জয় ধরমেশ এমান এমান বঁগা বুরু কোওয়াঃ কাথা অল ঞেল এনা। আয়মা হড়কো মেমেন কানা নুকুদ সানতাড় রেন বঁগা বুরু দ কো বাং কানা।  

নিৎ আয়মা হড়াঃ গে কুকলি রাকাপ্‌ কানা- সারনা ধরম দ তিনাঃ রকমাঃ মেনাঃ আ? সারনা ধরম রে তিনাঃ লেকান বঁগা বুরু মেনাঃ আকাদ, কোওয়াঃ? দিশম হড়দ নিৎ অকয় অকা সেচ্‌ কো তাড়ামা?

নুনৗ বাডায় কাতেহঁ সানতাড় কো সারনা ধরম তায়ম রেগেকো ঞিরাঃ আ, সে সারি ধরম রেগে মনে রিহিট কাতেকো তাঁহেনা ?