(হুডিঞ কৗহনী)
মকর কুঁবৗ 
দুর্গাচরণ মুরমু
দুর্গাচরণ মুরমু
ধারবুরু বির ভিতির কুয়ারী নৗই আড়েরে সাগেন তাকোওয়া আতু তিরিল ঘুটু। নেসদ্ ধৗরতী জাকাৎ করোনা আজার সে কোভিড-১৯ আজারতে লাখ-লাখ হড় গচ্ আকানা আর হড় গচ্ একাগে মেনাঃ কোওয়া আর আজার হঁ পাসনাও ইদি কান গেয়া। ভারত দিশম রেনাঃ অকা মুলুক হঁ বাকী বৗনুঃআ করোনা আজার বাং সেটের আকানা মেনতে।ঞেল-ঞেলতে গেল-মিৎ চান্দো পারমেনা স্কুল-কলেজ-জেগেৎ বিরদৗ গাড় হোস্টেল ক বন্ধ খৗতির সাগেন লেকান লাখ-লাখ পৗঠুওয়া অড়াঃ করে গে মেনাঃ আকাৎ কওয়া। সাগেন নেসদ্ আরে চানচ্ রেয় রাকাব আকানা। অলঃ পাড়হা রে যাও সেরমা গে আডি নাপায় রেজাল্ট তায়। ফুটবল-ক্রিকেট-কাবাডি-খো খো খেলোড করেহঁ আডি ধাওগে সরেশ খেলোডিয়া মেনতে সিরোপায় হামেট আকাদা। হড়কো শালা:হঁ আডি লাগে গেই গাতে দাড়েয়া। রৗশি-বৗসী তিরিল ঘুটু আতু তাকো বাহা-সহরায়-মাঃ মড়ে আডি রৗস্কৗ শালা ক মানাও এৎ তাহে। বিহা-বাপ্লা দং এনেচ সেরেঞ করে কুলহি ধুড়ি ডিগ্লা-ডিগ্লি কান তাঁহে।
গেল-পে সেরমা লেকা হুয় এনা নিৎ তিরিল ঘুটু আতুরে রাজআরী পার্টি খৗতির পে-পে গটাং মাঝি আর নায়কে ক তেয়ার আকানা। মাড়াং লেকা সিবিল-সৗগৗই বৗনুঃ আকাদা চেতান কুলহি-লাতার কুলহি-গান্ডে কুলহি হড়কো তালা। উন্দিন দ আতু খনা: জাহা তিনৗঃ সাঙ্গিন রে বেঙগাড়-বিলৗতি-আলু আরহঁ নানা হুনৗর হৗড়িয়ৗর সব্জি চাষ লেরে মিৎ রুতিহঁ বাং কুমুড়ো কান তাঁহে আর মিৎটানহঁ সিম, সিম সান্ডি বাং ক আদো: কান তাঁহেৎ । নে-বেতার মা অড়াঃ বাড়গে লাতার অড়াঃ রে জম আসুল: লেকা বেঁগাড়-বিলৗতি মা হেগেঁ আলু-পিয়াঁজ হকঁ লা-তাড়াও কাতেৎ ক আৎকিরেৎ কানা ঞিদৗ ভিতির তে।
পুস সাকরাৎ সে মকর পরব সেটেরঃ কানতে সাগেন রেন গাতে ক সিরজন, কায়েম, যোধা, জুরু, লধড় সাঁওতে তিরিল ঘুটু আতু চেতান কুলহি রেন সানাম গিদরৗ ক মকর কুঁবৗ বেনাও লৗগিৎ তালে ঢৗওরা, কুদ্, সিরিশ, খিজুর ডৗর মাঃ ক ধুরৗও আকানা। কুয়ারী নৗই ধিরি দারহা সুররে আডি রৗস্কৗ তে কুশি তে মকর কুঁবৗ ক বেনাও এদা। যাও সেরমা গে তিরিল ঘুটু -আতুরে পে-পে গটাং মকর কুঁবৗ ক বেনাও আ। আর আপান-আপিন কুলহি রেন গিদরৗ ক মকর মাড়াং দিন বৗউড়ি হিলোঃ দ বির-পাকাড় ক সেন্দরায়া আর ইনৗ হিলো দক হকু-কাটকমঃআ;জত্ কগে কিদুব দাকা দ পাতড়া রেক জমা আর জাঁহায় বিদেশ কৗমিরে মেনাঃ আকাদেয়া আতু-অড়াঃ বৗই হেজ্ দাড়ে আকাদা উনি লৗগিৎ হঁ পাতড়া রে দাকা ক লু কাতে ছাটকা রে জত হড়াঃ পাতড়া দাকা সাঁও ক পান্তে মেশা কায়া। বাউড়ী ঞিদৗ জৗপিদ অক্তে জাঙ্গা তালকা, তি বগল, বুকৗ রে, কড়াম রে তুড়ি সুনুম ক অজ্গ্ আ আর তিলমিঞ জম রেনাঃ চল মেনাঃআ।বৗউড়ী হিলোঃ গে গিদরৗ কক লৗই-লৗপৗই জং আ;যে মকর হিলোঃ ভোর রে আতু রেন জত্ গিদরৗ কক হহ জারওয়া এনগে আর মকর কুঁবৗ বেনাও আকাৎ কুয়ারী নৗই ধিরি দারহা রে মকর সিনান সে মকর তুপুন ক এতহবা - হাহাল আতে, কুলকুলি আতে, এনেচ-সেরেঞ আতে।
মকর তুপুন কাতে নৗই খন মিৎ লটা দাঃ অড়া: তেক্ ইদি তারায়া। অড়াঃ রে মেনাঃ হুড়ু-মুরৗই, বাড়গে-গডা রে চাষ আকাদ আবাদ করে নৗই খন আগু তরা দাঃ অনা করে ক তিরপিয়া-আ সেদায় খন গে নওয়া চল দ মেনাঃআ। আর নাওয়া-নাওয়া আংরপ-পেন্ট ক হরগা। অড়া:রে তেয়ার আকাদ ডুঁবু পিঠৗ, তিলমিঞ পিঠৗ,সুনুম রে ছাকাও পিঠৗ ঘুঘনী-খাঁজাড়ী জম কাতে আর তিকিন দাকা জম কাতে পাতা ঞেঞেল ক চালাঃআ।
বছর দিন রেনা: মুচৗৎ পরব ; সাকরাৎ পবরতিনৗঃ গরব রেনাঃ তিনৗঃ রৗস্কৗ রেনাঃ ডুঁবু পিঠৗ-জিল পিঠৗ আঁজম তরা উলি দাঃগে সাড়েরঃআ।তেহেঞ দ সাকরাৎ পরব সে মকর পরব। অনাতে আঙ্গা তরা সাগেন তাকো আতু কুলহি রেন গিদরৗ-সেঁড়া হড় সানাম কগে কুয়ারী নৗই ধিরি দারহা ক চালাও আকানা মকর তুপুন লৗগিৎ। সেন কাতে ক ঞেল তাকোওয়া বেনাও আকাৎ মকর কুঁবৗ দ বৗনুঃ আনা। পাহাং-পুহুং ঞুত রেক ঞেল কেদা- অকয় চকঁ জুঁডি আকাৎ তাকোওয়া। দারহা রে সেটের আকান সানাম ক আডি আট্ ক রাঙ্গাও এনা - আড়িশ এনা। রৗগিতে আডি আট্ কিকয়াও আতে এগের ক ধুরৗও এনা, গটা কুয়ারী নৗই দারহা ক তাল-তালাও হচ কেদা। মস্ মলিন আতে অড়াঃ তেক রুয়ৗড় হেজ না। বিচৗর ঞাম লৗগিৎ আতু মাঝি বাবা ঠেন ক লৗলিশ কেদা।
.webp)
