আদিবাসী বাবুলাল মুরমু ‘আদিবাসী’
মহাদেব হাঁসদা
বাবুলাল মুরমু দ সান্তালি সাঁওহেৎ রেন মিৎ ঞুতুমান অনলিয়ৗ, অনড়হিঁয়ৗ আর সেরেঞ গাবানিয়ৗ লেকাতে দিসম হড়কো বাডায়েয়া।
১৯৩৯ সাল রেয়াঃ ১২ জানুয়ারি, ভাগলপুর জেলা রেয়াঃ দুধসিমর আতোরে উনি দ ধৗরতি রেয়াঃ পৗহিল মারশালে ঞেল লেৎ তাঁহেনা। আচ্ বাবা আঃ ঞুতুম দ সুজন মুরমু আর আচ্ আয়ো আঃ ঞুতুম দ হিসি সরেন।
বাবুলাল তেকো দ তুরুই বয়হা আর বার মিসেরা কো তাঁহেকানা। উনিয়াঃ পৗহিল ঞুতুম দ তাঁহেকানা বাবুরাম মুরমু। ‘আদিবাসী’ দ আয়াঃ বাহ্না ঞুতুম কানা।
উনিদ পায়রা মিডিল স্কুল খন এতহপ্ শিখনৗৎ হাতাও কাতে দুমকা জেলা স্কুল রেয় ভুরতি লেনা। অনডে খন ১৯৫৮ সালরে মেট্রিক ার গোড্ডা কলেজ খন বি.এ. অনার্স (১৯৬৩) বিডৗও এ পাশ লেদা। অনা কাতে ঢের দিন তায়ম ভাগলপুর বিশ্ববিদ্যালয় খন এম.এ. (১৯৮৫) হঁয় পাশ লেৎ তাঁহেনা।
বাবুলাল মুরমু দ মাড়াংতে মিৎ জুনিয়র হাই স্কুলরে চেচেৎ-ইচ্ রেয়াঃ কৗমিরেয় বাহাল লেনা। অনা তায়ম আয়মা সেরমা দিশম রুখিয়ৗ (মিলিটারি) বিভাগ রেয় কৗমি লেদা। আর মুচৗৎ হৗবিচ্ দ বিহার সরকারাঃ ‘হড় সম্বাদ’ পত্রিকারেন সাসাপাড়াওয়িচ্ লেকাতে কৗমিরে বাহালে তাঁহেকানা।
মড়েয়া কিলাস (Class-V) রে পাড়হা বিদৗল খন উনি দ সানতালি সাঁওহেৎ চারচা রেয় ফেড্ লেনা।
উনিয়াঃ পৗহিল উতৗরাঃ অল- ‘বয়হা বাংবোন বেগারঃআ’- আর অনাদ ১৯৫২ সালরে ‘হড় সম্বাদ’ রে ছাপা সদর লেনা। অনাতায়ম আদিবাসী, পেড়া হড়, তেত্রে এমান আয়মা সাঁওহেৎ সাকাম রে উনিয়াঃ অনল, অনড়হেঁ, সেরেঞ, কৗহ্নি এমান ছাপা সদর আকানা।
তেহেঞ হৗবিচ্ উনিয়াঃ উছৗন আকান পুথি কোদ হোয়োঃ কানা-১। সৗরি সহরায় রে দঞ এনেচ্ গেয়ারে (১৯৬৬), ২। করতাল রাঁওয়া কান (১৯৭২), ৩. আখড়ারে ঝাম্-ঝাম্ (১৯৭৪), ৪. কয়ঃ হর (১৯৭৪), ৫. সরস সেরেঞ (১৯৭৬), ৬. দিসম ভক্তা (১৯৭৭),৭. সানতালি অনল (১৯৭৭), ৮. নাহাঃ সানতালি অনল (১৯৮৮), ৯. সানতালি পৗরসি আকিল (২০০১), ১০. অৗদ্ পৗরসি, সানতালি (২০০২), ১১। ঝৗলি (২০০২), ১২. অনলিয়ৗ হৃদয় নারায়ন মন্ডল ১৩. গুরু গোমকে ডঃ ডোমন সাহু সমীর ,১৪. গুরু গোমকে আদিত্য মিত্র সানতালি ১৫. সানতালি সাঁওহেৎ রেয়াঃ ইতিহাস, ১৬. সানতালি ভেনতা কাথা আর কৗইতুক, ১৭. অৗকিল মারসাল (১,২,৩,৪,৫,৬), ১৮. বাহা পরব (২০০৪)। নোওয়াকো মুদ্রে “কয়ঃ হর” দ অনড়হেঁ পুথি কানা আর “দিসম ভক্তা”, “ঝৗলি”- নোওয়া কিন দ কৗহ্নি পুথি কানা।
দিসম রেয়াঃ, সমাজ রেয়াঃ আর অকতে রেয়াঃ দলিল লেকাতে নোওয়াকো দ আডি সরেস সিরজন গে কানা। অনা বেগর ইরৗল গটেন অনল পুথিরে দ সানতালি পৗরসি, সাঁওহেৎ রেয়াঃ ঠাঁও লৗইতে অড়ে-অড়পাত তজবিজ হোয় আকানা। সেরেঞ কঁহ আডি মঁজ গাঃ গাবান আকানা। অনা বেগর, আরহঁ গেল পে গটেন দামান পুথি ‘আদিবাসি’ দয় অল অটো আকাদা মেনতে বাডায় আকানা।
বাবুলাল মুরমু ‘আদিবাসি’ দ অনলিয়ৗ আর অনড়হিঁয়ৗ সুমুং গেয় তাঁহেকানা; অনকা দ বাং। বিচকম এনেচ্-সেরেঞ রুসিকৗ লেকাতেহঁ উনি দ আডি ঞুতুমে হার লেৎ তাঁহেনা। পৗরসি, সাঁওহেৎ আর সমাজ ভৗলৗই আয়মা গাঁওতা সাঁও উনি দ জপড়াও এ তাঁহেকানা।
তেহেঞ উনিয়াঃ সৗগুন মাহারে অনলিয়ৗ বাবুলাল মুরমু ‘আদিবাসি’ ঞুতুমতে তাঁহেয়েনা অন্তর খনাঃ সোহাগ-দুলৗড় আর গুনমানাও জোহার।
.webp)
