(হুডিঞ কৗহ্নি)
কাড়াং ঞুঁতরে
-বাড়তাঙ সরেন
-বাড়তাঙ সরেন
আটেৎ রে গিতিচ কাতেঃগে অড়াঃ রেনাঃ কাঁত্ রে ঝিল্লো হেনাঃ চিতৗর সেচ্ এ কয়ঃকেদা চুড়কৗ মাষ্টার। লেঁজেঁর কাঠ রেনাঃ তল ফ্রেম তালারে মড়ে হড়াঃ চিতৗর। সানাম হড়াঃ মোচা লুটিরে লান্দা ঝালকাঃ কানা। আচ সাঁও বাবার গটেন কড়া, মিৎ সুমুং কুড়ি আর আচরেন জুরি এদেল। আকিন জুরিপৗরি তালারে গিদরৗকো দুড়ুপ আকানা ককে কাতেঃ। পে গেল সেরমা লাহারেনাঃ চিতৗর ; শান্তিনিকেতন ভবনডাঙ্গা মেলারেকো ছুবিলেনা। উন দ পে পে গটেচ গিদরৗগে ইস্কুল রেকো পাড়হাঃকান তাঁহেনা। ঞেল ঞেল তেগে কড়া কুড়িকো হারা জুয়ৗন এনা। জুরিপৗরি বানাহড়াঃ গে কুকমু তাঁহেকানা মজতে, নাপায়তে অলঃ সেঁড়াকাতেঃ নাপায় হড়কো তেয়ারঃমা মিৎহিলোঃ। প্রাইমারি ইস্কুলরেন মাচেৎ চুড়কৗ টুডু দ অনাতে আতো অড়াঃ বৗগিকাতেঃ বর্ধমান বাজার সুররে অড়াঃদুওয়ৗররে তেয়ার লেদা। জুরিপৗরিওয়াঃ কুরুমুটুতে গিদরৗকো দ পাড়হাও মুচৗৎ তায়ম তায়মগে চৗকরীরেকো বাহাল লেনা। মারাং কড়া বুসৗন দ জলপাইগুড়িরে BSNL রেন মিৎ মারাং আপিসার লেকাতেয় জয়েন কেদা। উনি সুতুঃ কড়া কুড়ি বানাহড়গে হাই ইস্কুলরেন মাচেৎ লেকাতেকিন বাহাললেনা। কড়াকুড়িকো সানাম বাপলা কাতেঃ আপান আপিন চাকরী ঠাঁওরেকো সেন উতৗর এনা।
ইস্কুলরে চৗকরী আর অড়াঃরে এরাৎ তেৎ আতে নানা পারকান কৗমি কৗসনি তালাতে নাপায় গে জিয়নে খাণ্ডাওয়েৎ তাঁহেনা চুড়কৗ মাষ্টার দ। চৗকরী খন জিরৗও মিৎ সেরমা তায়ম আচকাগে আচরেন এরায় হানা পুরীয়েনা। বাংমা ক্যানসার হুয় লেন তায়া। অনা তায়ম খন চুড়কৗ মাষ্টার দ আডি আডিগেয় একলায়েনা। আচরেন কুড়ি সুমি বার হাপ্তাগানে তাঁহেকানা গিদৗর পিদরৗ আতে। মেনখান ওনকো কো বৗগি ওটো আদে খান আডিয়ে একলা উতৗর এনা। একলাতে ঞিদৗ আনচানে বুজা। বাঞ্চাঃ হঁ বাং সানায়েয়া। গেজ গুরিচ ইসিন বাসাং সানামরে নিতং দ কৗমি কুড়ি দূলীগে ভরসা।
তেহেঞ দূলী দ বায় হেচ আকানা। পেড়া অড়াঃতে চং অকাতে চয় সেন আকানা। গিতিচ কাতেগে আয়াঃ মলং এ জটেৎ কেদা চুড়কৌ মাষ্টার। আঙরা লেকা ধিপৗও আকানা। রান আগু হঁ অকয়ে মেতায়া। দাঃ তেতাং কেদেয়া আডি জবর। মেনখান বায় বেরেৎ দাড়েয়াদা। চিতৗর রে লান্দায়েদ আচরেন জুরি সেচ কয়ঃকাতে আডিয় রৗগিয়েনা চুড়কৗ মাষ্টার। রাঃ রাঃগে সানা কেদেয়া। চেদাঃ চ উনৗঃ উশৗরায় বৗগি আদে জুরি তায় দ ! চেৎ এ চেকায়া ! গিতিচ রুওয়ৗড় এনায় চুড়কৗ মাষ্টার।
আচকাগে মোবাইল সাডেয়েনা। ঞেল কেদায় সাঁঙ্গিঞ সৗগৗই মিৎ গড়ম কড়া, মারশালে ফোন আকাদা। মিৎ পাথাম সা সাপড়াওইচ কানায় মারশাল সরেন। রাঃরাঃতে আয়াঃ দুকরেনাঃ কাথায় লৗয় সদরকেদা উনি ঠেন। সানাম আঁজম কাতেঃ মারশালে মেতাঃদেয়া, "গড়মবা নওয়া কাথাকোগে আমাঃ খাতারে অলমে, আর ইঞ ঠেন ভেজায়মে"।
বার চাঁদো তায়ম পিয়নাঃ তি তে 'বাঞ্চাঃ ডাহার' ঞুতুমান মিৎ পাথাম সেটেরেনা। পাথাম অটাঃ তরায় ঞেলকেদা চুড়কৌ মাষ্টার, পাথাম রেনাঃ পৗহিল রেগে আয়াঃ অল কৗহনী 'কাড়াং ঞুতরে ' ছাপা আকানা। অনা লাতাররে সোনা আখরতে অল আয়াঃ ঞুতুম ঝাকঝাকাঃ কানা। চুড়কৗ মাষ্টারাঃ বার মেৎহা খন হিডির হিডির মেৎদাঃ জরয়েনা…..।
.webp)
