আবোওয়াঃ ওয়েব পেজ- ধৗরতি পুরী সিরজন হাহাড়া। মৗনমী সিরজনহঁ আর মিৎ হাহাড়া। নোওয়া ধৗরতিরে অকয় অকা লেকা রৗস্কৗ-সুলৗং আর দুক্ হারখেৎ রে মেনাঃ কোওয়াঃ নোওয়া ডগর ঞাম দ আডি আঝাট গেয়া। এনহঁ যাঁহাতিনৗ ঝুড় দানাং রেগে কিয়ৗ বাহা তাঁহেন রেহঁ শ’দ মহঃকাও গেয়ায়। অনকাগে আবোরেন খবরিয়ৗ হলা ৮ নভেম্বর মিৎ অনলিয়ৗ আঃ তলাস এ ঞাম কেদা। বাডায় আকানা বাঁকুড়া জেলা বারিকুল থানারে মেনাঃ যাঁতাডুমুর আতোরে মেনায় মিৎ দুখৗলি অনলিয়ৗ মানতান অনন্ত কুমার সরেন। যাঁহায় দ ১০-১২ সেরমা ধরিয়ৗ গিতিচ্ গিতিচ্ তেগে অনড়হেঁ, হুডিঞ কৗহ্নি, রৗ স্কৗ রমজ্ কৗহ্নি, রেডিও গায়ান এমান অনল তালাতে মিৎ লেতাড় গে সানতাড়ি সাঁওহেদ্ এ চারচাও আগুয়েদা। আর নিত্ ২০ সেরমা লেকা পারকম রে গিতিচ্ গে মেনায়া। বেড়া তারাস হঁ বায় ঞামা। নোওয়াহঁ আর মিৎ হাহাড়া গে।
অনলিয়ৗ মানতান অনন্ত কুমার সরেন দ ১৯৬৭ সাল রেনাঃ ২১ জুন, পোয়লো ধৗরতি মারশাল এ ঞেল ঞাম আকাদা। জানাম দাতা শ্রীনাথ সরেন আর তোওয়া দারেদ কমলা সরেন। আতো রেনাঃ বিরদৗ গাড় খন গে অলঃজীয়ন এতহব তায়। ইনৗ তায়ম রানীবাঁধ হাই স্কুল খন মাধ্যমিক আর উচ্চমাধ্যমিক পাশ কাতেগে বাঁকুড়া সম্মিলনী কলেজ। অ্যাকাউনটেন্সি অনার্স লৗইতে বি.কম. পাশ। আর ইনৗ তায়ম খন গে জিয়ন পালটাও এন তায়া। বাডায় আকানা কলেজ রে পাড়হা পাড়হা তুলুজ্ গে জাঁগাকিন হাসো এহব লেন তায়া।
১৯৯৭ সাল খন দ মানতান সরেন গোম্কে একালতে পারকম রে গিতিচ্ উতৗর এনায়। নিত্হঁ গিতিচ্ গে মেনায়া। জম –ঞু তোপোন, দাঃ রাচা যতওয়াগে গিতিচ্ রেগে। বাডায় আকানা লেঁগা সেন নাসেনাঃ এ সড়তা দাড়েয়াঃআ। আর কো লেকা চাকরি, বাপলা, নাপায় সংসার রেনাঃ কুকমুয় ঞেল লেদ্ রেহঁ, সানামা গে এনকাইলোজিং স্পন্ডাইলাইটিস ঞুতুমান আজার তে লাঁবাও য়েন তায়া।
ধৗরতি রে বাঞ্চাও তাঁহেন খান, ধৗরতি রে ঞুতুম খদা অটঃ কাঃমে। অ্যাকাউনটেন্সি রেন পৗঠুওয়ৗ লেকাতে সাঁওহেদ্ রে অল লেকা অনকা দাড়ে দ বাং তাঁহে কান তায়া। তবে সাঁওহেদ্ রৗস্কৗ দ তাঁহেকানা। আর অনাদয় ঞাম লেদা আচ্ বাবা শ্রীনাথ সরেন ঠেন খন গে। উনিদ আর.পি.এফ তাঁহে কানায়। শ্রীনাথ সরেন গোমকেয়াঃ সিরজন মারাং গায়ান পুঁথি ‘টুওয়ৗর গিদ্রৗ’ মিৎ অক্তে গটা পাকাড় আঁদোড় লেদায়। অনা তায়ম ‘উপৗল’। বাডায় আকানা উনিহঁ গায়ান অনলিয়ৗ আর সেরেঞ বাডোহি তাঁহেলেনায়। বাবা আঃ অনা উদ্গৗও তেগে মানতান অনন্ত সরেন হঁ হুডিঞ গায়ান অল তালাতে কলম লাসের এ এহব কেদা। তবে উনিদ রেডিও গায়ান গে বৗড়তি কুশিয়াঃ আয়। রেডিও সেন্টার খন হঁ উনিয়াঃ গায়ান কো উছৗ ন আকানা। নিত্ ধৗবিচ্ তে ৮ গটাং হুডিঞ গায়ান পুঁথিয় অল আকাদা। মিৎ অক্তে গায়ান বাডোহি লেকাতে সাঁওতা তালারে সদরঃ সানা লেদেয়া। অনা সানা হঁ চাঁদোয় রেচ্ আকাদেয়া। মেনখান বায় রেচ্ দাড়েয়াকাদেয়া আয়াঃ মনে রেনাঃ দাড়ে আর বার-তি। আর অনা মনে মুরুক তেগে নিত্ সাঁওহেদ্ বাগানরে ঠাঁও এ হামেট আকাদা হুডিঞ কৗহ্নি রেন অনলিয়ৗ লেকাতে। গিতিচ্ গিতিচ্ তেগে সাঁওহেদ্ চারচাও! নংকান অসাম্ভেড় মনে মুরুক দ সারহাওনা কান গেয়া।
নিত্ ধৗবিচ্ তে মানতান সরেন গোমকেয়াঃ বারয়া কৗহ্নি পুঁথি সদর আকান তায়া। পোয়লো কৗহ্নি পুঁথি ‘অন্তর তালা সজ্’। বাডায় আকানা অনারে ১২৮ গটাং সাকামরে গেল এয়ায় গটাং নানাহুনৗর কৗহ্নি মেনাঃ আকাদা। আডি আয়মা অজে তালাতেগে ২০১৯ রেনাঃ ১৫ নভেম্বর রে উছৗন আকান তায়া। দসার কৗহ্নি পুঁথি ‘মিৎ আঁজলে রৗস্কৗ রাসা’। অনারে গেল পোন গটাং রমঁজ কৗহ্নি মেনাঃ আকাদা। অনাহঁ ২০১৯ রেগে পাটাবিঁধৗ পাতা খন সদর আকানা। বাডায় আকানা বানার পুঁথিগে মানতান গোমকে আয়াঃ টাকা তেগেয় ছাপাও সদর আকাদা। নোওয়া হঁ চেৎ আর মিৎ হাহাড়াঃ বাং কানা ? তায়ম দারাম আর কৗহ্নি কঁহ ছাপাও রেনাঃ সানা দ মেনাঃ গেতায়া।
হুডিঞ কৗহ্নি বেগরহঁ উনিদ গিদৗর বৗউলি আর অনড়হেঁ, সেরেঞ কহঁয় অল বাডায় গেয়া। বাডায় আকানা নিৎ ধৗবিচ্ ১০০ গটাং খন হঁ জৗস্তি অনড়হেঁ অল আকাদায়। তবে অল রেনাঃ সানা সে মনে দ হুডিঞ কৗহ্নি রেগে। হাপেন দিন রেনাঃ সানা হঁতায় কৗহ্নিকার লেকাতেগে সান্তাড়ি সাঁওহেদ্ রে ঞুতুম খদা দহয় রেনাঃ।
বাডায় আকানা উনিয়াঃ আয়মা অল কৗহ্নিগে ‘সিলি’,’ইতৗ’, ‘খেরওয়াল মেইল’, ‘সার’, ‘উমুল’ এমান পাথাম করে লেতাড়গে উছৗনঃ কান তায়া।
আবোরেন খবরিয়ৗ মানতান সরেন গোমকে ঠেন মিৎ কুক্লি দহ লেদায় বাংমা উনিয়াঃ নোওয়া আজার রেনাঃ কাথা তিনাঃ গান হড়কো বাডায়া সে তিনাঃ গান হড় খঁজ তলাস কো হাতাও আকাদা। তেলারে সরেন গোমকে লৗই আকাদা বাংমা বাডায় রেগে বাংকো বাডায়া। তবে নেবেতার মিৎ বার হড় বৗই বৗইতেকো বাডায় ঞাম এদা। উনিয়াঃ মচা খন গে বাডায় ঞাম এনা বাংমা ‘হলা মাহ্দের গে ‘তেৎরে ‘ পাথাম রেন সাসাপাড়াওয়িচ্ মানতান মহাদেব হাঁসদা গোমকে বাডায় ঞাম কাতে আডি আয়মা দুক্ সদর কাতে সারহাও এ চাল আদিঞা’।
বাং সারহাও কাতে অকয়হঁ বাংকো তাঁহে দাড়েয়াঃআ উনিদয় হোয়োঃ কানা মানতান সরেন আচ্ জানাম আয়ো কমলা সরেন। যাঁহায় দ ৫২ সেরমা মাড়াং রেন অনন্ত যাঁহা লেকায় যতন হারা লেদেয়া নিৎহঁ উনি অনন্ত অনকা লেকাগেয় যতনে কানা। নোওয়াহঁ সিরজনিয়ৗ আঃ আর মিৎ হাহাড়াঃ বাং কানা কি ?
–“উয়ু কৗঞমে আয়ো, গুঁগুঁৎ কৗঞমে, হাঁবুৎ কৗঞমে আয়ো, সোতোঃ কৗঞমে, আজোয়াঞ মে আয়ো, এওয়ের কৗঞমে আমাঃ আঞ্চারতে”।
.webp)
