World Suicde Prevention Day দিসৗ কাতে
-মাই বুরুলুকুই মান্ডি
১০ সেপ্টেম্বর দ ধৗরতি জাকাত আঁপড়েতে জিউয়ি নাসাও টেকাও দারাম মানাও-গুনৗও মাহা কানা। অকালেকাতে, আঁপড়েতে জিউয়ি নাসাওখন দোঃ দারাম গানঃআ, আর ‘জিউয়ি নাসাও’ সাতাম ইদিকাতে এমান তেয়াঃ সঃসেটের লৗগিৎ নোওয়া মাহা দ ২০০৩ সাল খন জাওগে উদ্যাপন হোয়োঃ কানা ধৗরতি জাকাত রেগে। নোওয়া মাহা উদ্যাপনরেন আয়ুর কদ International Association for Suicide Prevention,World Federation of Mental Health আর World Health Organisation (WHO).
WHO আঃ হিসৗব লেকাতে ধৗরতি জাকাত রে দিনৗম হিলোঃ ৩০০০খন হঁ বাড়তি মৗনমি আঁপড়েতে আকোওয়াঃ জিউয়ি কো নাসাওয়া, সেরমা রেদ ১০ লাখ লেকা। দিন কে দিন নোওয়া রেয়া হার দ বাড়হাও চালাঃ কানা, জাঁহা কসেচ্ দ মেনখান নাসেনাঃ মেৎ লুতুরাঃ খান আয়মা গে টেকাও দারাম গানঃআ আর মানওয়া দুরিব বন জতন জোগাও দাড়েয়াঃআ। সাধারনত উমের ১৫ সেরমা খন ৪৫ সেরমা উমেরান মৗনমি কগে জৗসতি কায়তে জিউয়ি কো নাসাও, আর এন্তেৎ ওনকো ঠেন খনগে ঘারঞ্জ লৗগিৎ, সমাজ লৗগিৎ, দিসম লৗগিৎ আয়মা আয়মা গুনৗন কৗমি কবো আশঃআ।
মৗনমি চেদাঃ আপনারতে আকোওয়া জিউয়ি কো নাসাওয়া ?
নোওয়া রেয়াঃ আসল আসল অজেকদ হোয়োঃ কানা- রেঁগেচ্-নাচার দসা, কৗমি বাং ঞাম, আপনার উতৗর হড়াঃ খুতি,দুলৗড়-দুপুলৗড়রে জাঁগেদারাম, পুরিক্ষারে ফেল, সমাজরে আপনারা ওপরোম সদররে এঁটকে টঁড়ে,ভুঁপুজৗও ( ধর্ষন অচঃ হঁ) জপড়াও অজেকো জাঁহান অজ্ তেগে আপনার পুরিবার সমাজ খন সাহাঃ, জটিল আজাররে পাড়াঃ, আরহঁ এমান এমান কৗউডি সামাজিয়ৗ হড়ম-মনে জপড়াও অজেকো মেনাঃ আকাদা। নংকান আয়মা আয়মা অজেকোতে মৗনমিয়াঃ মনে জিউয়িরে আজার, মেনমা মনে-জিউয়ি নিজোরঃআ আর উনগে মৗনমি আপনারতে আপনারাঃ জিউয়িকো নাসাওয়া। খান মনে নিজোরঃ মৗনমি চেদাঃ বাংবোন মেৎ-লুতুরাকোওয়া ? অনকোওয়া দুক্রে চেদাঃ বাংবো ভৗগিদারঃআ ? দাড়েয়া ভর চেদাঃ সানাম লেকান গড়সপহৎ বাংবোন এমা কোওয়া ? কম সে কম তেহেঞ ১০ সেপ্টেম্বর ধৗরতি জাকাত আঁপড়েতে জিউয়ি নাসাও টেকাও দারাম মাহারে নিন উডিচ্ গান রেহঁ অনা সাতাম চেতান দেলাং বোন গাডোনা।
সানাম মৗনমি কগে সমাজ রেন, দিসম রেন দুরিব কানাকো। নোওয়া মানওয়া দুরিব চেদাঃ আধিন দিন রেবোন হেলা ফেলা অচওয়াঃআ। লেগ্চার-ধরম মেৎ তেহঁ আপনারতে জিউয়ি নাসাও মা পাপ মেন্তেবো বাতাও আকাদা। নতে, মিৎধাও জিউয়ি চালাও লেনখান আরহঁ চেৎ রুওয়ৗড় হিজুঃআ ? দড়হাতে আরহঁ জানাম হোয়োঃআ ? অক বাড়ায়! নোওয়া লে-লেঁগেৎ ধৗরতিপুরিরে সুক্-দুক্ মেসা কাতেৎ রেঁগেচ্-হারকেৎ-শাসেৎ সাহাও কাতেৎ সিসিরজৗওয়িচ্ এমাঃ জিউয়ি চেদাঃ বোন লয়্ছয়া? আপনারা জিউয়ি মা আপনারতে বেনাওয়াঃ বাং কান, খান এটাঃ এমঃ ইচ্আঃ জিউয়ি, নাসাও রেয়াঃ অৗইদৗর দ চেৎ মেনাঃ তাবোনা ?
.webp)
