আবোওয়াঃ ওয়েব পেজ- অৗডি সেদায় রে মারে হাপ্ড়াম কো পেটের বাড়ে লাতাররে গাপাল মারাও কো দহয়েৎ তাঁহে কানা মেন্তে বাডায় আকানা অনকাগে হলা ৫ সেপ্টেম্বর ঞুহুম মাহা হিলোঃ পুরুলিয়া জিলৗ আদ্রা জীবনপুর আতুরে মেনাঃ পেটের বাড়ে লাতাররে ভারত জাকাত মাঝি পারগানা যুওয়ৗন মহলাঃ মিৎ সাঁঘার মিদুন হোয় পারমেনা। বাডায় আকানা যুওয়ৗন কগে হাপেন দিনরেন লৗউড়িয়ৗ, সমাজ সাঁওতারে যুওয়ৗন কো যাঁহা তিনাঃ কো লাহা হিজুঃআ, সমাজ সাঁওতা উনৗগে কেটেজঃআ, উনৗগে লাহান্তি হোয়োঃআ মেন্তে ভারত জাকাত মাঝি পারগানা যুওয়ৗন মহলে মনেয়া। সমাজ সাঁওতা উৎনৗও রেহঁ যুওয়ৗন কোওয়াঃ এনেম আয়মা মেনাঃআ। যুওয়ৗন কো ইদিকাতে নংকান আয়মা দিশ-হুদিশ লৗইতে মিদুনরে গাপাল মারাও হোয় আকানা মেনতে বাডায় আকানা।
আরহঁ বাডায় আকানা বাংমা নোওয়া মিদুনরে একেন বৗবু কো আতেদ্ সুমুং দ বাং মৗই তাকোহঁ সামাংরে হিজুঃ হোয়োঃ তাকোওয়া মেন্তেহঁ মহলে মনেয়া। যাঁহারে কাথা রাকাব্ কানা বাংমা তিরলৗ কদ বিচৗর-আচার-মিদুন করে সেলেদঃ দাও গে বাংক ঞামা,অনা জায়গারে পুরুলিয়া জিলৗ যুওয়ৗন মহল মিৎ জাঁগা লাহা কাতে বৗবু-মৗই আতেদ্ নোওয়া মিদুন-এ সৗখি সভা কেদা মেন্তেহঁ বাডায় আকানা।
নওয়া গালচ আখড়ারে সেটেরক তাহে কানা ১) পুরুলিয়া জেলা রেন জেলা পারানিক মানতান মতিলাল হাঁসদাঃ সাঁওতে আজ্রেন অড়াঃ গংকে মানতানিয়ৗ কাজলি হাঁসদা ২) যুওয়ৗন মহলরেন পারসেৎ মানতান রাজেন টুডু ৩) তেল কপি বারনি ঘাটরেন পারসেদ মানতান বেল টুডু ৪) জেলা গডেৎ মানতান গনপতি কিস্কু ৫ ) সাঁতুড়ি মুলুক পারগানা মানতান বুদ্ধেশ্বর টুডু ৬ ) রঘুনাথপুর মুলুক পারগানা মানতান নরেন্দ্র নাথ মান্ডি ৭) কাশিপুর মুলুক পারগানা মানতান গোপিনাথ মান্ডি ৮) নিতুড়িয়া মুলুক পারগানা মানতান সুনিল কিস্কু ৮) হুড়া মুলুক গডেৎ মানতান অজিত কুমার সরেন সাঁওতে আরহঁ আতুরেন মাঝি বাবা আর মাঝি হপন ক।
আখড়ারে যুওয়ৗন মহলরেন পারসেৎ মানতান রাজেন টুডু গোম্কে লৗই সদর কেদা বাংমা আবো সমাজ বেবস্থা রে সেদায় খন গে গণতন্ত্র,সমাজতন্ত্র লেকান বন্দেজ তাঁহেন তুলুজ্ আবোরেন বৗবু-মৗই তাকো তেহেঞ এটাঃ হড় ঠেন খন চেৎ লাগাওয়েৎ কোওয়া, নোওয়া দ অৗডি দুক্ রেনাঃ কাথা কানা। মানতান টুডু গোম্কে আরহঁয় তঁগে তরা কেদা বাংমা আবোওয়াঃ সমাজ বেবস্থা রে যাঁহা পুরিকাঠামো মেনাঃ আকাদা অনাতেহঁ মিৎটাং দিশম চালাও দাড়েয়াঃআ। আবোওয়াঃ সমাজ বেবস্থা লেকা আর এটাঃ সমাজরে বাং ঞেলঃ গঃ আ মেন্তে মানতান গোম্কেয় লৗই সদর কেদায় মেন্তেহঁ বাডায় আকানা।
পুরুলিয়া জিলৗ ভারত জাকাত মাঝি পারগানা যুওয়ৗন মহল- পীড়,মুলুক,তল্লাট সাঁঘার কাতে সমাজরেন যুওয়ৗন বৗবু-মৗই তাকো লৗইতে সমাজ চেতওনা মিদুন আরহঁ নংকাগে চালাও ইদিয়ায় মেন্তে যুওয়ৗন মহল পাহ্টা খন বাডায় ঞাম আকানা।
.webp)
