সিঁগি মাহা রেনাঃ সাকাম ‘চেরেচ্‌ আড়াং’- লেখা - ০২

তেহেঞাঃ আখড়ারে যাঁহায় কো সেলেদ্‌ আকান- সুজয় কুমার টুডু, রিলৗমালা মুরুমু, মানস হাঁসদা,  সূচনা হাঁসদা,  সারি ধরম হাঁসদা,  সুচাঁদ হাঁসদা,  আনন্দমোহন হেমব্রম,  শ্রী কা ন্ত স রে ন,  গাতে টুওয়ৗর,  এম. নেপোলিয়ন টুডু,  বিভূতি ভূষণ সরেন,  দুগাই টুডু,  বাবলু সরেন।

সুজয় কুমার টুডু, ক্লাস- I
জেলা - পশ্চিম মেদিনীপুর

রিলৗমালা মুরুমু, ক্লাস- III
জেলা - পুরুলিয়া

মানস হাঁসদা, ক্লাস-IV

জেলা - বাঁকুড়া

সূচনা হাঁসদা, ক্লাস - VIII

জেলা - বাঁকুড়া

১।।

 ফগড়া দাদা

সারি ধরম হাঁসদা

ফগড়া ফাদা পাগড়া দাদা

কয়গ্ মেসে নাতে,

গেনতে গেনেজ পানতে এনেজ্

থিরেন তামে গাতে।

আলে মালে  বাডায়ালে

আমাঃ বাহাদুরি,
হপন বৗবুয় রৗপুৎ কাতাম

সানাম সিঁয়ৗজৗরি।

ফগড়া ফাদা পাগড়া দাদা
জাঁবৈ ডাটাতাম লৗঁদুড়,
তৗগুম তুলুজ্ কেটেজ তৗবুজ্
চিকৗতে জেলেম হৗঁবুড়?

লো আমালে ঢাঁব কুটি
সোর আমালে ঠৗবু,
জমতে হৗনিয় হৗরয়ৗ কামা
লেটকা হপন বৗবু।

                       (২)

                সৗরি কাথা

এড়ে কাথা আলম লৗই আ
মেঁৎরে পড জঃ আ,
অৗড়িস অৗওহৗম এগের লেখান
লুটি মচা মঃ আ।

সৗরি কাথা সৗরি গেয়া
সৗরিতে গেম হড়ঃ,
আতো টলা তিঁগু বেরেৎ
হড় সাঁওতেম জড়ঃ। 

=O=O=O=O=O=O=O=O=

২।।

 ঝঁড়ে রঁড়ে

 সুচাঁদ হাঁসদা

তাঁহে কানাকিন বার বয়হা

ঝঁড়ে আর রঁড়ে

বাংদ উদৗর বাংদ লেলহা

কনা পৗইলৗ হঁকিন সড়ে  ৷

মিৎ দিনকিন চালাও লেনা

সন জাঁড়ি ইরোঃ

ঝঁড়ে রঁড়ে সাডে জাঁড়ি

ইর সময় বাং থিরোঃ  ৷

রৗগি এনাকিন ঝঁড়ে রঁড়ে

ধরাও আদাকিন জাঁড়ি

আরকিন মেনা মা লঃমে

এগের এৎ তাঁহেনাম আড়ি  ৷

=O=O=O=O=O=O=O=O=

৩।।

  বুলুং আর চিনি

  আনন্দমোহন হেমব্রম

          বুলুং দ ভাই রাহামা

          চিনি দ ভাই হেড়েমা।

          পোঁডা বানার

          সিবিল বেগার।

          চিনি মেনতে বুলুঙে চাটগ দামা ।

            (২)

       বাকডুলু

          আলম সাবে বাকডুলু

          এতেয়া সাগুন লুলু।

          ময়াম জমক

          নাসেয় কমক,

          কুলিয়েম বাংখান তালু ।

=O=O=O=O=O=O=O=O=

৪।।

মিলিয়াঃ মনেয় লৗই আ

     শ্রী কা ন্ত স রে ন

নিয়ৗ অক্ত মিলিয়াঃ মনে
অৗডি গেচ বৗড়িচ
গাতে কহ বাংক হিজুঃ
অকয় দুখে অৗড়িজ।

সেরমা রিমিল দিনৗমে হিজুঃ
কয়ঃ কাঃ আয় জানলাতে
উনি মিৎহড় নাপায় গাতে
দুখ সাহাঃ আহলাতে।

যুদিয় হোয় কঃ সেরমা রিমিল
অটাং কঃ আয় গটা

দাঁড়া- দাড়াতেয় দাঁড়া পুরৗউকে
নওয়া ধৗরতী টঠা।

যুদিয় হোয় কঃ চেড়ে- চুপড়ি
বাংখান পিপিড়জাং

মৗনমী লেকা গুজুঃ বতর
তাঁহে কঃ একাল বাং।

=O=O=O=O=O=O=O=O=

৫।। 

ঠিকৗ ঠৗউকৗ:

গাতে টুওয়ৗর

সিঁগে অতে বালে সৗরদি সৗগুন জারুম ঞুহুম ,

 মিৎ হাপতা পলমেনা তু ঝিক্ ঝিক্ থুকুম ।

মেরাল গুটি লিপি টুটি পুসি কঁঃ হৗনি ,

কায়ুড় কায়ুড় ঢেংকা রাজা দুঁদু পেড়া রৗনি ।

 গড়ম হাড়াম হুকৗয় ঞুঞু ঘড় ঘড় সাডে ,

হৗনি তরা জামড়ো বিঞ দুয়ৗর রেগে গাঁডে ।

কাটাপ্ কাটাপ্ সাদম তিঞ সাবে আলম রিকৗয় ,

 দেজ লেনখান কটা ঞুরমে উন খানগেম ঠিকৗয় ।

=O=O=O=O=O=O=O=O=

৬।।

 তওয়া-পুখরি

এম. নেপোলিয়ন টুডু

ইঞ গড়মে লৗই আদিঞা

এয়া গড়ম কড়া

নডে গে-ত তাঁহেকানা

আবোয়াঃ গৗই গড়া।

গড়ম বুঢি চেৎএম ঞামে

হিরিজ্ লেদায় তওয়া

বৗই বৗইতে বেনাও এনা

পুখরি নঅয় নওয়া।

উপৗল বাহা জেঁগেদ্ জেঁগেদ্

আলে পুখরি তালা

মারাং দৗইদ গালাং কাতে

বেনাও আলে মালা।

হুডিঞ হুডিঞ পুখরি তালে

বৗনুঃ অৗডি  দাঃ

জারগে জৗপুৎ আঁজম হিজুঃ

রে-ট কওয়াঃ রাঃ ।

ডাঁডা কতে দাঃরে দিনৗম

ডৗঁড়কৗ পুঠি হাকো

ঞেল কওয়ালে ইলন গলন

মঁজ্‌গে পায়রা আকো।

=O=O=O=O=O=O=O=O=

৭।। 

চাঁদ মামা 

 বিভূতি ভূষণ সরেন 

চাঁদ মামা চাঁদ মামা

নওয়া বসমতারে

মৗনমী অৗডি সাঁগে গে,

আমদ মিৎ হড়গে সুমুং

গটাগেম মার্শাল উনুম।

চাঁদ মামা চাঁদ মামা

আলে ছনা মেনায় তালে,

তওয়া দাকা এমায় মেসে ভালে

মেনাঃ তায় সোনা থৗরি

জমায় সৗরি সৗরি।

চাঁদ মামা চাঁদ মামা

চেদাঃ আমদ চটরে ?

চেদাঃ বাম তাঁহেন ফেডরে ?

আমাঃ ডেরা বুঝৗও কিদৗঞ পালেন,

চট রিমিল দানাং রেগেম তাঁহেন।

অঁডে খন গে ঞেল কওয়াম সানাম ,

অকয় হঁ বাংক দাড়ে দানাং।

=O=O=O=O=O=O=O=O=

৮।।

পুসি হপন

দুগাই টুডু

পুসি হপন মিঁউ মিঁউ

রাঃ বাডায় এদায়,

হপন বেটা সাবে লৗগিৎ

কুদৗও বাডায়ে কানা।

   
 (২)

ককর

ঞুৎ ঞিদৗ ককর কদ

রাঃ বাড়ায় তাঁহেন কান,

গিদ্‌রৗ কদ বতর তেদ

লুকুৎ লুকুদঃ কান

   

(৩)

তৗরুপ

বির বুরু ডঁড্‌হর রেদ

তৗরুপ ডেরা আকানায়

সেতাঃ সিঁগৗড় হৗলুম হৗলুম

হৗন্‌ডৗরৗও বাড়ায় কানায়।

=O=O=O=O=O=O=O=O=

৯।।

 (হুডিঞ মাছা কৗহ্‌নি)

 ফগলা-গড়ম 

 বাবলু সরেন

 ফগলা গড়ম হাড়াম যুদি চায় ঞুয়া গড়ম কড়াহঁ এমায় হুয়ুঃআ চাহে রেয়াড় কাতেঃ চাহে দাঃ দুল মেশা কাতেঃ | দশার হিলোঃ গড়ম হাড়ামে মেনা - ইঞদ চা বাংইঞ ঞুয়া গড়মতেৎ হঁয় মেনা - মিৎদিন ইঞাঃ লুটি ল লেনা অনাতে ইঞহঁঞ বৗগি আকাদা | যুদি গড়ম হাড়াম দাকায় জমা দাকা জুটিচদ ডৗবু ডৗবু আর গড়ম কড়াদয় জুটিজা চুপুৎ চুপুৎ বুলুং | বুলুং বাং জুটিচ হচ আয়খান তালা রাচারে গিতিজ তাবের ফান্দা কাতেয় রাগা মিৎ চুপুৎ বুলুং জুটিজ হচ আয়খানগেয় থিরঃ -আ | যুদি গড়ম হাড়াম খাতা কলমে উন্ডুকা তবে গড়মতায় খাতারে সজহে সজহে আঁকাবাঁকায় দাগা | বাংদ পুরুলিয়া-বাঁকুড়া রাস্তায় উদুগ বাংদ কুডৗম সেৎতে বাজার সেনঃ তাড়াম ডাহার, হেঁচং কোলকাতা সেনঃ ডাহার অকয় বাড়ায় নওয়াগে পালেন  জিয়ন রেনাঃ মুচৗৎ ডাহার ! কিদুব যখচ জিল দাকারে গড়মতায়দ রাসে তেগে বায় আন্টাঃ-আ অনাতেগে গড়মতায়দ দাঃরে  সাসাং লেওহা কাতেৎ ক এমায়া।

=O=O=O মুচৗৎ =O=O=O=