অনাতে জুন চাঁদো বল সাঁও সাঁওতে দিশমরেন ক্লাবক, গাঁওতাক আর সংগঠনক ৩০শা জুন লৗগিৎ সাত্-সাপড়াও রেনাঃ চিতৗর ঞেলঃগঃআ। মেনখান নেশদ অনকান অক্তরেগে যাঁহায় সিধু-কানু খৗতির সান্তাড় হড়-হপন ঠেন নুনা গরব, উনকিন রেন গে বংশধর রামেশ্বর মুরমুদ ১২ জুন ঞিদৗ বৗঈরীয়াঃ তিতে হেলেচ্ হচয়েনায়। বাডায় আকানা রামেশ্বর মুরমুদ আয়া ঘাঁরঞ্জরেন তিরলৗ হপন চেতান বে-বৗড়িচ্ বেওহার খৗতির রড়-দারাম লেদায় আর অনাতেগে উনিয়াঃ জিউয়ি এম হোয় এন তায়া। নোওয়া ঘটন মাড়াং খনা সাপড়াওয়াঃ বাং কানা তো ? সিধু-কানু বংশ রে কুয়ৗ জৎ লৗগিৎ অ-আদিবাসীক বাংক রিকৗয় দাতো ? তামাম সান্তাড় হড়-হপন নিৎহঁক হিরখৗওয়াকোওয়া অনা বাংক পরমান লৗগিদঃ কানা তো ? নিৎ আয়মা হড়াঃ মচারেগে নংকান কাথা রাকাপ্ হিজুঃ কানা।
নোওয়া ঘটন ইদিকাতে অঁডেরেন ডুমকা সান্তাড় সমাজ হেলেজিয়ৗ পাকড়াও হচয় লৗগিৎ দৗবিক দহওয়াকাদা আর অৗডি মারাং আন্দোড় লৗগিৎক সাপ্ড়াঃ কানা। নতে ডুমকৗরে ঞুহুম মাহা হিলঃ সিধু-কানু মুরমু চক্রে আদিবাসী পৗঠুওয়া গাঁওতা পাহ্টা খনহঁ বিন রড়তে মিছিল কাতে হেলেজিয়ৗ পাকড়াও হচয় লৗগিৎ দৗবিক দহওয়াকাদা। সাঁওতে ডেপুটি কমিশনার রাজেশ্বরি বি য়াঃ তালাতে ঝাড়খন্ড পনৎ মানতান মুখিয়ৗ মন্ত্রী হে্মন্ত সরেন ঠেন দৗবি সাকাম অল কাতে অনা নিরঘিন ঘটন রেনাঃ সি বি আই তলাশ লৗগিৎ দৗবিক দহ আকাদা।
নতে ঘাঁরঞ্জ পাহ্টা খনহঁ থানারে সাদ্দাম আনসারি ঞুতুমান মিৎ কড়াহাঃ ঞুতুম তে হেলেচ্ আকাদ্ মাম্লাক করাও আকাদা। তবে তেহেঞ ধৗবিচ্ অকয় কড়াহঁ অৗওরিক পাকড়াও দাড়েয়াকোওয়া মেন্তে বাডায় আকানা আর অনাতেগে হলা সিধু-কানু বংশধর রেন প-পংড়াক আকিনা মুঠৗন লাতাররে দুড়ুপ্ কাতে কৗয়ধি পাক্ড়াও হচ লৗগিৎ ধরনাক এম এদা। নোওয়া ধরনা মঞ্চ রেনাঃ চিতার সোস্যাল মিডিয়া তালাতে ধৗরতি জাকাত হড়ক ঞেল কেদা, তামাম আদিবাসী হড়-হপন সাঁওতে সান্তাড় হড়-হপনকহঁ। অকয় অকয়দ নোওয়া চিতৗর ঞেল কাতেক হাজাম উতৗর কেদা আর মিৎ বার হড়দ কুক্লিক রাকাপ গদ্ আকাদা- তবে চেৎ তেহেঞ সিধু-কানু রেন বংশধরক দিশম হড়াঃ গড় বাংক ঞাম এদা? প্রশাসনিয়াহাঃ এনেম লৗইতেহঁ কাথাক রাকাপ্ আকাদা।
আয়মা হড়গে নোওয়া লক ডাউন ঢেসনা কাতে নিরজালাক জৗপিৎ জং কানা। আরহঁ নতে আয়মা হড় তালারেগে কাথা রাপাচাঃ চালাঃ কানা নোওয়া ঘটন বাডায় কাতেহঁ চেদাঃ বাংলা, বিহার, ঝাড়খন্ড, আসাম, উড়িষ্যা হড় তালারে নোওয়া ঘটন ইদিকাতে অনকান আঁদোড় বাং ঞেলঃগঃ কানা। তবে চেৎ ৩০ শা জুন হুলমাহা তাঁগি্রেগে মেনাঃ আকাৎ কোওয়া ? নতে মিৎ বার হড়াঃ বাঁখেড় নংকা আঁজমঃ কানা আবো তেহেঞ সিধু-কানু রেন বংশধর আঃ অড়াঃরে লাগাও আকান সেঁগেল বাংবন ইড়িজ্ দাড়েয়াঃআ এন খান গাপা দিন আপনার অড়াঃরে সেঁগেল লাগাও লেন রেহঁ অকয়হঁ বাংক সুরঃআ। সিধু-কানু বংশধর আঃ ঘাঁরঞ্জ রেন তিরলৗ হপন চেতান যুদি নংকান ঘটন হুয় দাড়েয়াঃআ এনখান আপনার বেড়া রেদ অকয়ে দুঃ মেয়া ? অকয় কদ আরহঁ মনে মনে তেক মেন জং কানা, নেতার যুগ পাল্টাও আকানা নিৎ আপনে বাঁচলে বাপের নাম। নতে বাডায় আকানা “আবোওয়াঃ দিশম আবোওয়াঃ রাজ” লাইতেহঁ আয়মা হড়াঃ নিৎ মিৎগে কুক্লি রাকাপ্ কানা- তবে চেৎ “আবোওয়াঃ দিশম আবোওয়াঃ রাজ”রেদ নংকাগে হোয়োঃআ ?
নতে আরহঁ আয়মা হড়াঃ কাথা রাকাপ কানা নুন দিন এনখান আবোদ “হুল মাহা”দ বাং বন মানাও আকাদা “হুল পরব” গেবন মানাও আগুওয়াকাদা। আর যাঁহায়কো “হুল পরব”ক মানাও আগুয়েদা উনকুহঁ আদ খৗলি খৗলি আল বন দোষ গিডি কাকোমা। সিধু-কানুওয়াঃ মান-মহৎ যাঁহারে মেশা মেনাঃআ অঁডেদ নিৎ দিশম হড় তালারে নংকান আরহঁ আয়মা কুক্লি গে রাকাপ হেচ্ দাড়েয়াঃআ আর উনকু তালাখন গে সলহে হঁক পাঁজা উডুক দাড়েয়াঃ মেন্তে আয়মা হড়গে আকোওয়া মতামতক সদর আকাদা।
.webp)
