সন্ধাড় শ

(হুডিঞ কাহ্‌নি)

  সন্ধাড় শ

 জ্যোৎস্না সোরেন

                                                    

তেহেঞ ঞেল ঞেলতে পে হাপ্তা পারমেনা ৷

মিৎ মারাং গুরলৗও হয় বান্ডোল "আম্ফান"রেনাঃ আতাস তে সুরৗইয়াঃ সাধের সংসার ,সাধের অড়াঃ বান দাঃ তে লে লৗন্দুড় এনা ৷

নতে মাতলা, অন্তে ইছামতী তালা মালা রে তাঁহেকান ঝিটে বেড়া অড়াঃ, টিন তে দাব,মাৎ্ রেনাঃ চাচ তে এটেৎ আকাৎ হুডিঞ অড়াঃ রেহঁ সুখ তাঁহেকানা, শৗন্তি তাঁহেকানা, আশা তাঁহেকানা,দুলৗড়হঁ তাঁহেকানা ৷

হানে সেদায় বাবা হাড়াম তাক বিদৗল রে নামালিয়ৗ লছমন সরেন বিহার খন হেচ কাতে নন্ডেগেয় ডি বাড়গে লেনা ৷ অনে উন খন পে পুরুষ ধৗবিচ নিতহঁ সুরৗই তাকদ নতে রেগে মেনাঃ কওয়া "৷

কৗমি জম হড়,নালহা তুমৗল কাতে যা উডুচ সাঞ্চাও অনা তিগি বৗবু কওয়াঃ এম মঁড়ে কাঠা  হাসারে অড়াঃ দুয়ৗর, ভিডি,মেরম,ডৗংরি ঝত কওয়াঃ তে সংসার রেনাঃ মায়া নৗড়ি ৷ অনা সাঁও সাঁও বার বিঘৗ হাসাহয় কিরিঞ লেদা সুরৗই আচ্‌ বাবা রঘূনাথ ৷ নিতদ অনা সানামাঃগে দাঃতে চেহেল চেপেল ৷

হড়ক মেনা নৗই দ বাংমা আয়ো লেকা ৷ হানে সেদায়  মানওয়া জনম রেনাঃ ফেডাৎরে নৗই ধারে রেগে বাংমা  মানওয়া সাঁওতা হারাবুরু লেনা ৷ গিরু নৗই,বাহা নৗই ধারে আবো বন বৗড লেনা ৷ হিহিড়ি পিপিড়ি খন চৗইগাড়,চাম্পাগাড়..গিরু নৗই ধারে রে বৗডআন মৗনমি কওয়াঃ নৗই-নেমাচার,গাংনৗই  সুড়ৗ নৗই  রেনাঃ লিঙ্গি দাঃ রে  দুল মেসা লেনা ৷

মেনখান সুরৗইয়াঃ জীয়ন রেত নৗই মা জুগিন লেকা ৷ সানামাঃ মেৎ সামাংরে জম কেদায় ৷ ভিখৗরি কাতেয় আড়াঃকেৎ কওয়া সুরৗই লেকান আরহ হাজার হাজার সুরৗইতাক ৷

সরকারী ত্রান রেনাঃ খাতারে সুরৗইদ এ পি এল ৷ অনা খৗতির বায় ঞাম আকাদা তিরপল বায় ঞাম আকাদা  গড় সপহৎ ৷  হড় পিছু বার আঞ্জলে তাবেন, আর মিৎ প্যাকেট দাঃ, বাণ দাঃ অৗওরি আঁড়গো হৗবিচ ক এমাৎ ক তাঁহে ৷

হানে মারাং হর তে তাড়াম ঞঃ লেখানেম তবেয়েনা  পঞ্চায়েত পৗর্টি অফিস ৷ অন্ডে গে সরকারাঃ আরাঃ খাতারে ঞুতুম রাকাব লেনখান তবে  সরকারী "ত্রান" ঞামঃআ ৷ অনাতে সুরৗই দ হানে সেতাঃরে বেরেৎ তরা মিৎ কড়াম দাঃ ঠেলাও পারম কাতে মারাংহর রে রাকাব কাতে পার্টি অফিস সেৎ এয় মহডা য়েনা ৷

,অড়াঃ রেনাঃ যা উডুচ বস্তা চাওলে কিন ঘেঁট হবর তরা লেদা, সাঁওতে টুকুচ টকাঃ অনা কতেগে ইস্কুল অড়াঃ রেনাঃ মিৎ কড়ঁরে ঘারঞ্জ তাক আচ লেকান আডি গান সুরৗই তাকয়াঃ !

ইঁট রেনাঃ চুলহৗ রে.. মিৎ টুকুচ দাঃরে মিৎ চুপুৎ চাওলেয় ইসিনা বৗহুতায় পুদি ৷ বারয়া গিদরৗ দাঃ মেসা দাকা এম কাতে অৗকিন দ খৗলি দাঃতেৎ বুলুৎ আঁতে কিন জমা ৷ অকা হিলঃ দ আঁঞ্জম তিয়োঃ আঁতেন তিয়োঃ জম দাকাক এম লেনখান থৗরি য়াতে লৗইন রেক তিঙ্গুনা এঁগা হপন!

নওয়া গে জৗনিচ মলং লিখন দক মেতাঃ আ ৷ অকয়াঃ মলং রে চেৎ অল মেনাঃ আ অকয় হঁ বায় বাডায়া ৷  অকয়ে বাডায় লেদা বৗটি য়াতে মিৎ দিন,  মিৎ লাপেৎ দাকা লৗগিৎ,ভিখৗরি লেকা লৗইন রে তিঙ্গু হোয়োঃ তাকওয়া সুরৗই তাক ! রহড় জহারে লিঙ্গি আড়গোঃ মেৎদাঃ অড়েচ আঞ্চার তেয় জৎ কেদা পুদি ৷

ঝেঁট বঙ্গা রিনিচ বেড়া উনদ বহঃ চটরে ৷ অৗডি কষ্টতে লৗইন রে তিঙ্গু কাতে আয়াঃ ঞুতুম অল রেনাঃ দাও এ ঞাম কেদা সুরৗই ৷

রুয়ৗড় অক্ত হর ধারে রেনাঃ টৗইম কল খন আঞ্জলে কাতে দাঃ এ ঞু কেদা ৷ আর বহঃ হড়ম করেয় জৎ আনা ৷ উদগৗর আর সিতুংতে বহঃ অৗচুর লেকায় বুঝ কেদা ৷  অৗডি দিন লাচ পেরেচ বাং জম তে হড়ম দাড়ে হ বৗনুঃ তায়া ৷ গামছা তে বহঃ দৗড়হি কাতে তাড়াম ডাহার রে  বৗবু কওয়াঃ দালান বাখোল পারম অক্তে  জাঙ্গাকিন ঠাকেৎ এন তায়া সুরৗইয়াঃ ৷ অন্তে খনগে হয়তে হেলকাও হিজুঃ কানা লল দাকা রেনাঃ সন্ধাড় শ ৷ ভর তিকিন রেনাঃ লল সিতুংরে  হর ধারে রে মেৎ জৗপিৎ কাতেয় তিঙ্গু থির এনা সুরৗই ৷ লল দাকা রেনাঃ সন্ধাড় শ তে ধিরি তে তেন কড়াম রেনাঃ দুখ বোহেল আড়গো য়েনা জহা জহাতে ৷