জানাম ডিঁড্‌হা

                                                  (হুডিঞ কৗহ্‌নি)

  জানাম ডিঁড্‌হা

প্রফেসর শশীকান্ত মুরমু

                

আয়মা হড়াঃ হহ আর সিলপিঞ ঠেলাওরেনা সাডেঃ আঁজমতে, ম্যানেজার সতীশবাবু জৗপিত খনেঃ এভেন গৎ এনাঃ। তালা ঞিদৗ আয় উমান দুটা গান বাজাঃ কানা। বেজার মনেতে বিরিৎ কাতে ম্যানেজার গমকে সিলপিঞ এ ঝিচকেদা।

 আযোদিয়ৗ বুরু চেতান হালেগে বার সের্মাগান হুয় এনা , কান্ঠাড় ঝারণা আর ঠুর্গা গাডা ধারেরে সরকার বারয়া নাওয়া পাওয়ার পাম্পস্টোরেজ এ বেনাও আকাদা। অঁডে রিনিচগে ম্যানেজার কানায় সতীশ বৗবুদ। পাম্পস্টোরেজ রেনাঃ মারাং বৗউন্ডারী ভিতরি রেগে গেল বারয়া গান কোয়াটার মেনাঃআ। আরহঁ এটাঃ স্টাফ কঁহ মেনাঃ কোওয়া। অনা মিৎটাং কোয়াটার রেগেয় তাঁহেনা ম্যানেজারদ।

সিলপিঞ ঝিচকাতেগে  হাহাড়াঃ এনায় সতীশবাবু। ঞেল কেদায়, দারোয়ান রামচরন সাঁও কোয়াটাররেন গেল বার পে হড়কো তিঙ্গু আকানা। মিৎটেন হড় জুবুথুবু কাতে ক তল আকাদিয়া , আর রামচরন অনা বাবের এ সাব আকাদা। সতীশবাবু নাপায় সাঁহিচ উনি হড় এ বেঙ্গেৎ আদিয়া। অৗডিগে রেঙ্গেচ হড়। হড়মরে মিৎটেন  পাঞ্চি আর অড়েচ গেঞ্জি। বেচারা যত হড়তেকো দাল লাপালুপু আকাদিয়া ।।

ম্যানেজার এ কুলিকেদেয়া চেৎ বেপার , নুনৗ ঞিদৗ দমেপে কৗউমৗউ এদা ? আর নুইগে বাং অকয় ?  দারোয়ান রামচরন এ লাই কেদা -সাহেব নুইদ কুমড়ু কানায়। পাম্প স্টোরেজ রেনাঃ মেশিন অড়াঃ কুডামরে দুড়ুব কাতে চুকুওআকান তাঁহেনায়। তিরে আরহঁ মিৎটেন টেঁগজ তায়। ইঞ ঞেলতেয় দৗড় এৎ তাঁহেন। ঞির আঁতেঞ হৗড়ুব আটকাও কেদেয়া। ইঞৗ গুল আঁজমতে কোয়াটার খন আয়মা হড়কো উডুক এনা। আদ আম ঠেনলে সাব আগুকেদেয়া। আদ আমগে পুলিশ ফোন আকোমে।

ম্যানেজার সতীশ বাবু পৗচরিরে টেঁডার দহ টেঁগজ এ কয়ঃ আদা।  উল্টাসেন মায়াংলেকা আরাঃগে চেৎ চং লাঠা আকানা। অৗডিজোর ধমকাও কাতে উনি হড় এ মেতাদেয়া ……আমদ অকয় ? নূনৗ ঞিদৗ চেৎ খৗতির নঁডেম বলও আকানা ? আর অনা টেঁগজরে মায়াং চেকাতে লাঠায়েনা ? সৗরি সৗরি লৗইমে আর বাংখান পুলিশ আঃ তিরেলে চাল কামা, লৗইমে।

বৗই বৗইতে ইখড়ুম কাতে দুড়ুপ আকান উনি হড় বহঃ তুলকাতে ম্যানেজার সেন এ কয়ঃকেদা। দুখৗলি আড়াংতেয় লৗই কেদা ……বাবু , ইঞদ কুমড়ুদ বাং কৗনাঞ। আর নওয়া টেঁগজতে অকয়হঁ বাং ইঞ মাঃ আকাৎ কোওয়া। ইঞদ সিদাম মান্ডি। তিহিঞ যাঁহারে আপে পাম্পস্টোরেজ রেনাঃ মেশিন অড়াঃপে বেনাও আকাদা , অঁডেগে আলেয়াঃ  তুরুই পিড়হি জানাম ডিঁডহা তাঁহে কান তালেয়া। ইঞৗ বুকৗ তপা ডিঁডহা তিঞ অনা। তিহিঞ খন পে সের্মা মাড়াং পাওয়ার প্রজেক্ট বেনাও খৗতির,  সরকার অনা জানাম ভিটৗয় হাতাও কেদা বৗহু আর গিদরৗআঃ তি সাবকাতে অড়াঃ দুয়ৗর বৗগিকাতেঃ , ডেম হানাসা রাঙ্গা আতো রেলে বাসায়েনা। বাড়ায়াম গমকে , অনা অড়াঃরে বাহা- সহরায় জখান ইঞরেন আপাৎ বঙ্গাবুরুয়েৎ তাঁহেন।  গুজুঃ লাহায় মেতা দিঞ তাঁহেন …..বেটা ,ইঞিঞ গচ্‌ লেনখান আমহঁ নংকাগে বঙ্গায় তাবোনমে। মিৎটেন সিম কুটৗম কাতে , শারজম ফুড়ুতে পে ধাও হাঁন্ডি চডরমে। এন্তে খানগে আলে স্বরগ  পুরিরে শান্তিতেলে তাঁহেনা। অড়াঃ দুয়ৗর জানাম ভিটৗ যতপে রেচ্‌ কিদিঞা। মাসে, লৗইমে সাহেব, ওকারেঞ বঙ্গাবুরুয়া ?  ওকারেঞ চডর আকোওয়া ইঞরেন গুর আকান মারে হাপড়ামক ? নংকাগে সের্মারে নিয়ৗ দিনরে তালা ঞিদৗ কুমড়ু লেকা পৗচরি দেজ পারম কাতে অনা ইঞৗ জানাম ভিটারেঞ হিজুঃআ। ঘেটকাতেঞ আগুয়েয়া মিৎটেন সিম আর বতলরে হাঁন্ডি। সিম কুটৗম তায়নম হাঁন্ডি চডর কাতেঞ মেনা……..জঁহার গোঁসাই মারাং বুরু, জাহের আয়ু , মড়েক তুরুইক, সাঁওতে মারে হাপড়ামকো ,মা এনখান নে নওয়া আতাংপে। স্বরগ পুরিরে নায়তে নাপায়তে সুখতে শান্তিতে তাঁহেন পে বাড়ে। আর যদিপে দাড়ে খান ইকৗ  কাঞ পে। আপেয়াঃ জানাম ভিটৗ বৗঞ বাঞ্চাও দাড়েয়াদা। ইকৗ কৗঞপে ।। সিদাম আদ বায় লৗই দাড়ে য়াদা। অৗডিজোর আপনার কড়াম দাল দালতেয় রাঃ কেদা।

সিদামআঃ দুখৗলি কাথা আঁজম কাতে , সানাম হড়ক কয়ঃ থির এনা। সৗরিগে মানওয়া শশনঃ  উৎনৗও ঞুতুমতে তিনৗ আদিবাসী, আকোওয়া জানাম ভিটৗ অত্‌হাসা বৗগি কাতে ডাহরাও আকানাকো ঞুতৗৎ দিশোমতে। সিদাম লেকা তিনৗ সান্তাড়াঃ রাঃ রদন চং গুরলৗও বাড়ায় কান  আযোদিয়ৗ বির গাজাড় আর বুরু সত্‌ করে। অনারেনাঃ হিসৗব,তিনৗ হড় গে বাং ক দহওয়াকাদ্‌ ………?