(26 th June: Internatioal day against Drug abuse দিশৗ কাতে)
ড্রাগ-নেসা দ বিষ গে মেন গানঃআ
-ডাঃ সুরেন্দ্রনাথ মান্ডি
জমসিম বিন্তি খন বো বাডায়া যে- লিটৗ গঁসায় মেনমা মারাংবুরুদ মৗনমি বাড় অচ লৗগিৎতে সাগাৎ চাউলে সাঁও রানু-রান মেশা অচ কাতেৎ যুওয়ৗন বয়হা-মিসেরা পিলচু তেকিন হাঁডিয় বেনাও অচ লেৎ কিনা। অনা হাঁডি রাসা ঞুবুল অচ কিনতে মান হুঁস এ আৎ অচ লেৎ তৗকিনা, আর………….।
হোয়, অনা হাঁডিদ ড্রাগ কান গেয়া। ড্রাগ রেনাঃ মেনেৎ দ রান গে- বেবেসাঃ, বৗড়িজাঃহঁ। এনতে ড্রাগ দ রান চেৎ লেকা মেন গানঃআ অনকাগে মেন গানঃআ বিষ হঁ….. চেৎ লেকাম বেওহারা, অনা চেতান টেঁহাড়ঃআ,ড্রাগ দ রান সে বিষ কানা।
নাহাঃ যুগ রেনাঃ ঞুতুম লেকাতে ঢেরগে সাহেব সাহেব আইকাঃ,মেনমা হেরোইন,কোকেন,হাসিস,ম্যান্ড্রেকস ,এল এস ডি এমান এমান; আর পৗঊরৗ,আফিম,গাঁজা,ভাং এমান কঁহ ড্রাগ কান গেয়া। ড্রাগ দ নেশাওয়ানাঃহঁ মেন গানঃআ। নোওয়াক ড্রাগ কদ ইংজেক্ট খৗড় কাতে, সুঁগরৗও কাতেৎ,ঞু কাতেৎ,চেপেচ্ কাতেৎ,হড়ম রে হাতাও হোয়োআ। অনাতায়ম অনাকদ মায়াম রে মেসা আ, আর নেসা হোয়ো আ – মেনমা বু-বুলা, মনে জিউয়িরে রৗস্কৗ অৗইকাআ, আর মান –হুঁস এ আৎ অচয়া , বুগি বৗড়িচ্ বিচৗর রেয়াঃ খেমতায় আ-দা। নোয়াক ড্রাগ, মাত্রা বাহের বেওহার লেখান জিউয়ি বৗতিহঁ ইঁড়িজ আ। নাহাঃ ইস্কুল্ কলেজ রেন পৗঠূওৗয় গিদ্রৗ কো ডেন ড্রাইট চিট্ সুঁগরৗও কাতে, খু-আজার রেনাঃ রান-সিরৗপ এমান এমান ঞু কাতে হঁ আডিগেক নেসায়েদা । নঁডে লৗই লৗকতি কানা- আবো আদিবাসী সান্তাড় যুওয়ৗন কদ হাঁডি-পৗউরৗ নেসা – জানাম রেগে অৗডি বৗড়তি বোন ঝৗলি লাটপাটাওয়াকানা; খৗতির হড়ম’, জৗতি,সমাজ পিছ্লৗ কান তাবোনা,নিজোরঃ কানা।
যুওয়ৗন কগে দিশম লাহা ইদিয়রেন লৗউড়িয়ৗ কদ। অনাতে যুওয়ৗন কো চেতান জৗতি রেয়াঃ, দিসম রেয়াঃ আয়মা দায় দৗয়িক মেনাঃ আকাদা। যুওয়ৗন কোওয়াঃ বুরধি-দিসৗ আৎ উতৗর লেনখান সমাজ,দিশম হঁ নিরবুলিআ,লেঁগড়জঃআ। আর নংকা হোয় লেনখানগে বৗইরি জৗত,সমাজ,দিশম কোওয়া দ মোলমুলি,দাও গেকো পাঁজা বাডায়া। চেটমাল কো,মেনদ লাহাওয়াকান দিশম কদ মিত পান্থা কো হাতাও আকাদা। এনতেৎ নাহাঃ দ সামাং দাপ্রাম লৗড়হৗই কাতে এটাঃ দিশম হামেট সে গবল রে আগুয় তেদ আয়মা এঁটকেটঁড়ে মেনাঃ আকাদা। অনাতে লাহাও আকান দিশম কদ,লাহা চালাঃ কান দিশম ক চেতান তি লাহা কাতেৎ এটাঃ সেনতে বাজার দখল মেনমা আমালগিরি রেয়াঃকো কুরুমুটুয়েদা। অনাতে ওনকো দ জৗতিয়ৗরি চৗরিত্ রেয়াঃ রেহেৎ গে পৗটুব্ তাড়াও লৗগিৎতে ড্রাগ নেসাতে দিশম রেন যুওয়ৗন-সমাজ কো বুল কাকো কানা,ওন কোওয়াঃ উইহৗর-বুরধি- লাহান্তি ডাঁডাকো রাপুৎ এৎ তাকোওয়া। ড্রাগ দ বেওহৗরিচ্ আঃ সুমুং দ বায় খুতিয়া, পুরিবার খন এহব কাতে জৗতি আর দিশম হঁ লহজৗরি কাতে শ্মশানতেয় কোলেয়া।
নাহাঃদ হেপ্রাও রেয়াঃ যুগ কানা, লাহা চালাঃ রেয়াঃ যুগ কানা, কৗমি কাতে নাপায়তে আসুলঃ রেয়াঃ যুগ হঁ কানা। হেপ্রাও লাহা চালাঃরে লেঁজেৎ ঞুর লেনখান সে সমাজ সংসার খন ছাপাডাও লেনখানগে মনেরে হুলাস ভাঁগা হিজুঃআ। উন দ অনাখন রাড়া দুগঃ লৗগিৎ আর বাংখান লোভ-লালচ্ বাং সাম্ভাড়াও দাড়েয়াঃ খৗতির আসরা হাতাও হোয়োআ ড্রাগ ক চেতান, মেনদ নেসা ক চেতান। আর নেসা দ নংকানাঃ কানা,যাঁহাদ মিৎ ডঁডেক লৗগিৎ তেরেহঁ মনে জিউয়িয় রাড়েজ্ দাড়েয়াআ, দুক্ কষ্টয় হিড়িঞ অচ দাড়েয়াআ আর নঃঅ নোওয়াগে কাল দ। মিৎধাও নেসা-জালাম রেম ঝৗলি লেনখান অনাখন রাড়া দোগোঃ দ অৗডি আঝাট গেয়া। যেহেতু নেসা দ বুরধি –দিসৗয়ে আ-দা, খান নেসায়িচ্আঃ দ সানামাঃ গে আদঃআ- মা্ন, সনমান,টাকা, পয়সা এমন চেৎ হড়ম’জিউয়িহঁ। উনিয়ৗতেৎ দ সমাজ রেয়াঃ বুগি কৗমিদ অহগে হোয় দাড়েয়াআ,উনি দ সমাজ গাঁডারে তেয়ারঃআ।
জৗতি,সমাজ, দিসম মালটঃ খন রিহৗই লৗগিৎতে দিসম রেন সরকার মেন দ আবো সানাম কো চেঠাঃ হোয়োআ। যাও সেরমা ২৬ জুন হিলো তেৎ ‘ধৗরতি জাকাত ড্রাগ করেনাঃ বৗড়িচ, বেওহার জাঁগে দারাম মাহা’ মানাও সুমুং লেখান বাং গানঃআ,দিনৗম হিলোঃগে ড্রাগক বিরুদ্ আঁদোড় আর পরচার কৗমিরে লাহা হিজুঃ হোয়ো তাবোনা সানাম সচেতন মৗনমি কগে। ড্রাগ যাঁহায় ক পাচারা,সারভারা,বেওহারা- ওনকো বিরুদ্ রে সরকার কাজাক্ তে লৗড়হৗই এ রিকৗয় মা । অনকান কদ অৗডি কাজাক তে শাস্তিয় এমা কোমা। ড্রাগ খন যুওয়ৗন কো যাতে সাঁগিঞ রেকো তাঁহে দাড়েয়াঃ অনা লৗগিৎতে সানাম বো লৗগয়ৗওপাড়াও লেনখান জুওয়ৗন কো মারশাল ডাহার তেবোন সোতোঃ দাড়েয়াকোওয়া আর আপনার হড়ম-জিউয়ি, জৗতি,সমাজ,দিসম হঁ রিলৗমালা জিয়ৗড়গে তাঁহেন তাবোনা।