আবোওয়াঃ ওয়েব পেজ : ৫মে গুরু গমকেয়াঃ জানাম মাহা। সানাম সান্তাড় জৗতিঠেন মিৎ অৗডি গরবান মাহা কানা। অনাতে নেশহঁ গুরুগমকেয়াঃ ১১৬ সেরমা পুরৗও জানাম মাহা অৗডি মা্নত্ সালাঃ মানাও হোয় পারমেনা। বাডায় আকানা বাংলা, বিহার, ঝাড়খন্ড, আসাম, উড়িষ্যা এমন চেৎ বাহ্রে দিসম বাংলাদেশ রেহঁ গুরুগমকেয়াঃ জানাম মাহা অৗডি রৗস্কৗ সালাঃক মানাও আকাদা। তবে নেশদ দিসমরে লক ডাউন চালাঃ কান খৗতির আয়মা জায়গারেগে যাও সেরমা লেকা লাক্চার আখড়া কদ বাংক সাপ্ড়াও দাড়েয়াকাদা। বাডায় আকানা গাঁওতা কদ পে-পোন-মঁড়ে হড়ক লৗইতে বঁগা বুরু কৗ্মি আর গুরুগম্কেয়াঃ মুঠৗনরে বাহা মালা আরাও আর গুরু গম্কে লৗইতে মিৎ-বার বাঁখেড় কাতেগে জানাম মাহা মা্নত্ আখড়ারেনাঃ কৗমি হরাক মুচৗদ্ আকাদা। আয়মা হড়গে আরহঁ ঘাঁরঞ্জরেন হড় সুমুং আতেগে অড়াঃরেক মানাও আকাদা মেন্তেহঁ বাডায় আকানা। তবে সোস্যাল মিডিয়ারে হয়-দাঃ লেকা আডি আয়মা হড়গে গুরু গম্ঠেন আকোওয়া মানত জোহার আর উইহৗর আঁজলে ক চাল আকাদেয়া।
নোওয়া লক ডাউন তালা রেহঁ Social Distance মানাও কাতেৎ গুরু গমকেয়াঃ জানাম মাহাক মানাও কেদা পুরুব মিদিনপুর জিলৗ রেনাঃ তমলুক রৗস্কৗ মহল রেন রৗসিয়াক। আখড়ারে সেটেরক তাঁহেকানা মান তান দেবেন্দ্র নাথ হেম্ব্রম, ডঃ সুরেন্দ্র নাথ মান্ডি, অমূল্য হাঁসদা, কান্ত সরেন, শিবরাম মুরমু, রাজু মুরমু, রাম কিস্কু আরহঁ এমান পেড়াক। অনকাগে পুরুলিয়া জিলা রেনাঃ কান্টাডি ‘‘সনত্ তারাস” ক্লাব, আর হুড়া কেঁদবনা ডৗহিরেঁহ গুরু গমকেয়াঃ জানাম মাহা গাঁওতা পাহ্টা খন মানাও হোয় এনা মেন্তে বাডায় আকানা।
তবে সোস্যাল মিডিয়ারে নংকান পোস্ট ঞেল কাতেৎ আয়মা হড়াঃ যেলেকা রৗস্কৗ সে গরব আটকার আকানা অনকাগে আর মিৎ পাহ্টা হড়দ অনকা কুশি-রৗস্কৗ বাংক আইকাঊ লেদা মেনতেহঁ বাডায় আকানা। উনকুওয়াঃ কাথাদ সোস্যাল মিডিয়ারে মিৎ- বার বেগর সানাম পোস্টগে সান্তাড়ি পৗরশি তেদ বাং ঞেলঃগঃ কানা। উনকুদ নংকান পোস্ট ঞেল কাতেৎ হাপেন দিন সান্তাড়ি পৗরশি রেনাঃ মিৎ মুহিম দশা হঁক ঞল ঞামেদা মেন্তেক সদর আকাদা। নংকান পোস্ট ঞেলতে আর মিৎ - বার হড়াঃ মেনদ গুরু গম্কে ঠিকৗ বায় ঠিকৗ কানা সান্তাড়ি অনলিয়ৗ কানায় মেন্তে। নঁডে আয়মা হড়াঃ মেনদ নংকা কাতেগে সেদায় হড় আয়মা জিনিসক আৎ লেদা।
গুরু গম্কেয়াঃ মুড়ুৎ কাথাগে তাঃহে কানা- “ অলেম আৎ লেরে// রড়েম আৎলেরে // ধরমেম আৎলেরে আম হঁম আদঃ’’। গুরু গম্কে আয়াঃ জিয়ন দরশন রে উইহার ঞাম লেদা পেয়া শাবাদ্- অল, রড় আর ধরম। যাঁহাতেদ মিৎটাং জৗতি আয়া লেগচার-নেমাচার তালাতে বাঁঞ্চাও তাঁহে দাড়েয়ায়।
মেনখান তেহেঞ কাথা রাকাপ্ কানা গুরু গমকেয়াঃ জানাম মাহা ধুপ – ধূঁড়া আতেৎ মানাও লেখান গে। চেৎ সানাম কৗমি হোয় পুরৗও এনা সে দায়িত্ব হঁ চাবায়েনা ? আয়মা হড়াঃ মচা রেগে আঁজমঃআ চিকিতে পুঁথি-পাথাম অনকা মাছা বাং সদরঃ কানা। মিৎ বার সদরঃ কান রেঁহ পাঠকিয়ৗ কঁহঁ অনকা মাছা পাড়হা রেনাঃ রৗস্কৗ বাংক সদরেদা। সিলেবাস বেগর আর পুঁথিকঁহ অনকা বাং ঞাপামা। নোওয়া আনাট নিৎহঁ গুরু গম্কেয়াঃ ১১৬সেরমা পুরৗও জানাম রেহঁ ঞেলঃগঃ কানা।
রড় হঁ তেহেঞ বাজার শাহাররে হারাঃ কান বাবু মৗই তাক অনকা মাছা বাক রড় এদা। ইস্কুল, কলেজরে পাড়হা কান আয়মা বাবু মৗই তাক হঁ সান্তাড়িতে অনকা মাছা বাক পাড়হা কানা।
ধরম রেহঁ সারি সারনা রেনাঃ জঁট বাং রাড়া লেনা।
তেহেঞ নোওয়া জানাম মাহারে আয়মা দাবিগে রাকাপ হেচ্ আকানা পছিম বাংলা, বিহার, ঝাড়খন্ড, উড়িষ্যা অকারেহঁ গুরুগমকে ঞুতুমতে সাঁওহেদ্ শিরপা বাং চালু আকানা। অনা লগন চালুঃমা। গুরু গমকেয়াঃ আয়মা কৗটিচ্ কৗটিচ্ পুঁথিক মিৎ ঠেন অল সামটাও কাতেৎ রঘুনাথ মুরমু অনল মালা ছাপাও সদরঃমা।
গুরু গম্কেয়াঃ জিয়ন আর সাঁওহেদ্ ইদিকাতেৎ আরহঁ সরকারি ভাবতে খঁদরঁদ হোয়ো মা।
নংকান দাবিক ইদি কাতেৎ গুরু গমকেয়াঃ জানাম মাহা মানাও লেনখান আরহঁ সারথক কঃআ মেনতে আয়মা হড়গেক লৗই সদর আকাদা।
.webp)
.webp)
.webp)
