 |
| আযোদিয়া বুরু |
আবোওয়াঃ ওয়েব পেজ : লক ডাউন আর লক ডাউন। আরহঁ তেশার তেখার লক ডাউন তেহেঁঞ খনগে তঁগেয়েনা ১৭ মে ধবিচ্। নওয়া লক ডাউনরে আয়মা হড়গে আয় উমানেৎ তাঁহে নাক নেসদ হেচং আযোদিয়া বুরু সেঁদ্রাদ। হড়াঃ আয় উমানগে সারিয়েনা। আযোদিয়া বুরু সেঁদ্রা দিহ্রি বাবা মানতান শ্যাম সুন্দর মান্ডি গমকে মিৎ বেওরা সাকাম তালাতে দেশ-দিশম রেন সানাম হড়ক সোস্যাল মিডিয়ারে বাডায় হচ আকাৎ কোওয়া যে দিসমরে চালাঃ কান করোনা ভাইরাস খাতির দারায় কান ৭ মে (বাইসাখ কুনামি) আযোদিয়া সেঁদ্রা নেস লেকাদ থুকুম তাঁহেন কানা। অনা সাঁওতে অনা হিলঃ আযোদিয়া বুরু সেঁদ্রা ঞুতুমতে হিজুঃহঁ মানা গেয়া। তবে নেয়াম সে সেরওয়া লেকাতে দিহ্রি বাবা বগাঁ বুরু কামিদয় কামিয়া মেনতে বাডায় ঞাম আকানা।
নওয়া বেওরা আঁজম তরা দিসমরেন আয়মা আয়মা শিকারি কোওয়া রৌস্কা মনে রাপুৎ এন তাকোওয়া মেনতেহঁ বাডায় ঞাম আকানা।
নংকাগে সেঁদ্রা সাপড়াও আকান মিৎ শিকারিয়া অঘর মুরমু আঃ কাথা লেকাতে বাডায় এনা – বছর দিনরেনাঃ সেঁদ্রারে নেশ করোনা ভাইরাস খাতির বাং সেন দাড়েয়া কানতে মনেরে সারিগে আডি দুক্ বুঝা কানা। উনিয়াঃ কাথা খনগে বাডায় ঞাম এনা বাংমা সেঁদ্রা সাপড়াও আকান হড়দ সেঁদ্রা চালাঃ বাংক মানা কোওয়া। উনিয়াঃ মচা খনগে সেঁদ্রা চালাঃ লাইতে মিৎ দুখালি সেরেঞ আড়াং অডক এন তায়া-
‘‘বাইশাখ বঁগা পুরনিমা, আযোদিয়া সেঁদ্রা
শিকারিয়া মনদ জুরি, আলম মানাঞা।
সুগি চেঁড়ে রাগ্ রেদ, বহঃ সিঁদুর আরুপ মে
কুইলি চেঁড়ে কুহুয় রেদ, কয়ঃ হরিঞ মে।’’
বাডায় আকানা নংকাগে আযোদিয়া বুরু সেঁদ্রা লাইতে আডি হাজার গটাং সেরেঞ মেনাঃ আকাদা। মান তান মুরমু আঃ মুচাৎ কাথা নিৎ দিসমরে চালাঃ কান করোনা ভাইরাস খাতির আর অনা লেকাতে দিহ্রি বাবাহা থুকুম আইন লেকাতে সানাম কওয়াঃগে বাতাও লেগ্ কানা।
তবে নেতার সেঁদ্রা কাথাহঁ আইন আকানা মেনতে বাডায় আকানা। আর মানাও হঁক মানাও আগুয়েদা। মেনখান আদিবাসী হড়দ সেঁদ্রাক চালাঃ কান গেয়া। আর হাপেন দিনহঁ সেদায় লেকাগেক চালাঃ আ মেনতে আয়মা হড়গেক মেন এদা। চেদাসে নওয়াদ আদিবাসী গাঁতাৎ রেন হড় কোওয়া মিৎ লেগচার কানা। আর চালাঃ খান সেঁদ্রা ঞুম কাতেগেক চালাঃআ। চেদাসে নওয়াহঁ বাডায় আকানা বাংমা যাঁহায় কড়া মিৎ ধাওহঁ আযোদিয়া বুরু সেঁদ্রা বায় সেন আকানা উনিদ কাথায় আয়ো কলেরেগে মেনায়া। অনালেকাতে মিত্ ধাও হোলোও আযোদিয়া বুরু সেঁদ্রাদক চালাঃ গেয়া।
নোওয়া আযোদিয়া বুরু সেঁদ্রা তিস খন এহব আকানা। আর যাহাঁ তিস নিয়াবার লেকা থুকুম তাঁহেয়াকানা সে বাং ? নোওয়া কিন কুক্লি লাইতে সেটের হোয় লেনা মিৎ পুরুধুল ঞুতুমান অনলিয়া মান তান গোমস্তা প্রসাদ সরেন, ‘তেৎরে’ পাথাম রেন সাসাপাড়াওয়িচ্ মানতান মহাদেব হাঁসদা আর পুরুলিয়া জিলা পারগানা বাবা মানতান রতন লাল হাঁসদা গম্কে তাকঠেন। সানাম কোওয়া তেলাদ মিৎ মিৎ গেয়া। লাই আকাদাক আযোদিয়া বুরু সেঁদ্রা তিস খন এহব আকানা মেনদ আডি আঝাট গেয়া আর দশার তেলারেদ আকোওয়া দিশাতে বাডায় বানুঃ আন। নঁডে খন গে আয় উমানঃ কানা বাংমা নোওয়া মাড়াং তিসহঁ জানিচ্ বাং থুকুম তাঁহেয়াকানা। লাই গানঃআ মিৎ লেতাড় গে হুয় হেচ্ আকান আযোদিয়া বুরু সেঁদ্রা রেনাঃ নাগামরে ২০২০সাল দ মিৎ বেড়জাঃ সাল গে তাঁহেলেনা।
নেশহঁ আযোদিয়া বুরু সেঁদ্রা হুয় লেন খান হুনাং বিহার, ঝারখন্ড্, উড়িষ্যা রেন শিকারিয়া সালাঃ নোওয়া বাংলা রেন শিকারিয়া কোওয়াঃ সুতান টাঁডিরে মিৎ সাঁওতে মিৎ ঞিদাক ধুঁগেড় এনেচ্-সেরেঞ কেয়া। দিন বেড়া গল বুনুম ধারে ধারেতে তিনাঃ শিকারিয়া কড়াক গল আচুর কেয়া। অনা সোররে মেনাঃ হাতি কুটাম ধিরি অনাহঁক তুল তুল কাঃ কেয়া। নতে পৌল সেরমা হেচ্ আকান আয়মা নাওয়া শিকারিয়া কদ সিতা ডাডিদাঃ ঘানে ঘানেক ঞূ কেয়া, অকারে সিতা উপ ঞামঃ কানা পাঁজা বাডাকেয়াকো আর সংসার জিয়ন রেনাঃ আয়মা কাথাগেক সেঁড়া আগুকেয়া।
মেনখান তেঁহেঞ ধারতি জাকাৎ করোনা ভাইরাস (কোবিদ -১৯) খাতির নুন মারাং সেরওয়া নুন মারাং ঞুতুমান সেঁদ্রা চালাঃ খন থুকুম কাতে গে নেশদ শিকারিয়াক অড়ারেগে তাঁহেন লাগাও এৎ কোওয়া। আর চালাঃ সানা লেৎ করেহঁ অকয়হঁ বাংক লাই দাড়েওয়াকো কানা -
টুংকিরে তাবেন, পাঞ্চিরে ঘেঁটমে
হাপে শিকারিয়া তাঁগিয়েপে।।
.webp)
.webp)
.webp)
