সিঁগি মাহা রেনাঃ সাকাম ‘চেরেচ্ আড়াং’ লেখা- ৬৯

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com  

 

তেহেঞাঃ আখড়ারে যাঁহায় কো সেলেদ্‌ আকান- রিলৗমালা মুরমু, ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟᱹᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ,  ᱠᱤᱥᱠᱤᱱ ᱫ ᱷ ᱟ   ᱢ ᱩᱨᱢ ᱩ, সুচাঁদ হাঁসদা, বাড়তাঙ সরেন, দুগাই টুডু, সনাতন টুডু, সীতেন মান্ডি, সমর লাল টুডু, পিসি কিস্কু।

রিলৗমালা মুরুমু, ক্লাস- IV
জেলা - পুরুলিয়া

১।।

ᱴᱮᱱᱴᱮ ᱵᱷᱩᱪᱩᱝ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 

ᱵᱩᱨᱩ ᱰᱤ ᱨᱮᱱ ᱴᱮᱱᱴᱮ ᱵᱷᱩᱪᱩᱝ
ᱜᱚᱨᱚᱵ ᱠᱟᱛᱷᱟᱭ ᱞᱟᱹᱭᱟ,
ᱥᱮᱛᱟ ᱦᱚᱸ ᱵᱟᱝ ᱯᱩᱥᱤ ᱦᱚᱸ ᱵᱟᱝ
 ᱠᱩᱞᱮ ᱟᱹᱥᱩᱞᱮᱭᱟ ᱾

 

ᱠᱩᱞ ᱢᱟ ᱦᱟᱱᱤᱭ ᱦᱟᱨᱟᱭᱮᱱᱟ
 ᱫᱟᱢᱯᱟ ᱫᱟᱨᱩᱢ ᱯᱷᱟᱜ,
 ᱨᱮᱜᱮᱡ ᱞᱮᱠᱷᱟᱱ ᱴᱮᱱᱴᱮ ᱴᱟᱜᱟᱜ
   ᱠᱚᱞᱮ ᱨᱮᱜᱮᱭ ᱡᱷᱟᱢ ᱯᱟᱜ ᱾

 

ᱵᱟᱪᱚᱭ ᱡᱚᱢᱟ ᱤᱥᱤᱱ ᱫᱟᱠᱟ
 ᱠᱷᱚᱠᱚᱡ ᱠᱟᱱᱟᱭ ᱡᱮᱞ,
 ᱥᱤᱠᱷᱟᱹᱣ ᱠᱟᱛᱷᱟ ᱢᱮᱛᱟᱭ ᱨᱮᱢᱟ
 ᱦᱟᱵᱩᱸᱲ ᱟᱛᱮᱭ ᱠᱷᱮᱞ ᱾

 

ᱢᱤᱫ ᱫᱤᱱ ᱫᱚ  ᱟᱹᱥᱩᱞ ᱠᱩᱞᱟᱜ
 ᱵᱚᱦᱚᱜ ᱞᱚᱞᱚ ᱭᱮᱱᱟ,
ᱴᱮᱱᱴᱮ ᱵᱷᱩᱪᱩᱝ ᱛᱟᱹᱜᱩᱲ ᱠᱟᱛᱮ
 ᱵᱤᱨᱛᱮᱭ ᱵᱚᱞᱚᱭᱮᱱᱟ ᱾

======= ᱛ =======

২।।

ᱥᱮᱛᱟᱜ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱦᱮᱸ ᱜᱚ ,
ᱥᱮᱛᱟᱜ ᱮᱱᱟ ᱛᱤᱱᱨᱮ ?
ᱥᱤᱢ ᱠᱚᱠᱚ ᱚᱰᱠᱮᱱ
ᱥᱩᱠᱽᱨᱤ ᱠᱚ ᱠᱚᱸᱭᱮ ᱠᱚᱫ
ᱵᱮᱲᱟ ᱦᱚᱸᱭᱮ ᱨᱟᱠᱟᱵ
ᱥᱮᱛᱟᱜ ᱮᱱᱟ ᱩᱱᱨᱮ ??

ᱦᱮᱸ ᱜᱚ ,
ᱥᱮᱛᱟᱜ ᱮᱱᱟ ᱛᱤᱱᱨᱮ ?
ᱥᱮᱛᱟ ᱦᱚᱯᱚᱱ ᱠᱚ ᱠᱷᱤᱞᱰᱩᱭᱚᱱ ?
ᱟᱢᱮᱢ ᱞᱩᱸᱰᱟᱭᱮᱫ
ᱦᱚᱲ ᱠᱚᱠᱚ ᱟᱸᱜᱚᱵ
ᱥᱮᱛᱟᱜ ᱮᱱᱟ ᱩᱱᱨᱮ  ??

ᱦᱮᱸ ᱜᱚ ,
ᱥᱮᱛᱟᱜ ᱮᱱᱟ ᱛᱤᱱᱨᱮ ?
ᱵᱷᱳᱨ ᱜᱟᱹᱰᱤᱭ ᱧᱤᱨᱮᱱ
ᱥᱩᱭᱩᱲ ᱦᱚᱭᱮ ᱦᱚᱭᱠᱮᱫ
ᱛᱩᱭᱩ ᱠᱚ ᱠᱩᱫᱟᱹᱣ ᱮ ᱟᱠᱟᱵ ᱥᱟᱠᱟᱵ
ᱥᱮᱛᱟᱜ ᱮᱱᱟ ᱩᱱᱨᱮ ??

======= ᱛ =======

 ৩।। 

ᱵ ᱤᱨ ᱫᱤᱥᱳ ᱢ

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱵᱤᱨ ᱵᱩᱨᱩ ᱛᱮ ᱯᱮᱨᱮᱡ 
ᱟᱞᱮ ᱫᱤᱥᱳᱢ ᱛᱟᱞᱮ,
ᱥᱟᱦᱟᱱ ᱥᱟᱠᱟᱢ ᱡᱚ ᱛᱮ
ᱠᱤᱥᱟ.ᱲ ᱟᱠᱟᱱ ᱯᱟᱞᱮ |

 

ᱫᱟᱨᱮ ᱨᱮᱱᱟᱜ ᱩᱢᱩᱞ ᱨᱮ
ᱚᱠᱛᱚ ᱯᱚᱞᱚᱢ ᱟᱞᱮ,
ᱪᱟ.ᱛ,ᱵᱟ.ᱭᱥᱟ.ᱠᱷ ᱥᱤᱛᱩᱝ ᱫᱤᱱ
ᱡᱤᱣᱤᱭ ᱡᱤᱭᱟ.ᱲ ᱛᱟᱞᱮ |

 

ᱞᱟᱯᱷᱟᱝ ᱰᱟ.ᱨ ᱠᱷᱚᱱ ᱪᱮᱬᱮ
ᱨᱟᱜ ᱦᱚᱢᱚᱨ ᱟᱠᱚ,
ᱡᱤᱭᱤ ᱨᱟᱲᱮᱡ ᱚᱲᱟᱜ ᱠᱷᱚᱱ
ᱟ'ᱡᱚᱢ ᱦᱤᱡᱩᱜ ᱛᱟᱠᱚ |

 

ᱫᱟᱨᱮ,ᱱᱟ.ᱲᱤ,ᱨᱟᱱ ᱨᱮᱦᱮᱫ 
ᱞᱚᱜᱚᱱ ᱧᱟᱢ ᱟᱞᱮ,
ᱨᱩᱣᱟ. ᱦᱟ.ᱥᱩ ᱥᱟᱦᱟᱭ ᱞᱟ.ᱜᱤᱫ
ᱯᱟ'ᱡᱟ ᱟ.ᱜᱩᱭ ᱟᱞᱮ |

 

======= ᱛ =======

৪।।

ᱰᱟᱰᱤ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

  

 ᱰᱟᱰᱤ ᱫᱟᱜ ᱫᱚ ᱨᱤᱲᱤᱢ ᱨᱤᱲᱤᱢ,
 ᱢᱚᱡᱜᱮ ᱧᱮᱞᱚᱜ ᱯᱷᱟᱹᱨᱤᱭᱟᱹ ;
 ᱥᱮᱭᱟᱞᱚᱢ ᱚᱱᱮ ᱦᱮᱞᱠᱟᱜ ,
 ᱫᱷᱟᱨᱮ ᱫᱷᱟᱨᱮᱛᱮ ᱪᱟᱹᱨᱤᱭᱟᱹ ᱾

 

 ᱩᱯᱟᱞ ᱥᱟᱠᱟᱢ ᱪᱮᱛᱟᱱ ,
 ᱨᱚᱴᱮᱭ ᱫᱩᱲᱩᱵ ᱟᱠᱟᱱ ;
 ᱰᱟᱹᱲᱠᱟᱹ ᱫᱚᱠᱚ ᱪᱤᱞᱵᱤᱞᱟᱜ,
 ᱠᱷᱮᱞᱳᱰ ᱮᱱᱮᱡ ᱡᱚᱝ ᱠᱟᱱ ᱾

 

 ᱨᱮᱭᱟᱲ ᱜᱮᱭᱟ ᱥᱮᱛᱮᱧ ᱫᱟᱜ ,
 ᱦᱚᱲᱢᱚ ᱛᱩᱠᱩᱱ ᱞᱮᱠᱟᱱ ;
 ᱨᱟᱵᱟᱝ ᱨᱮᱫ ᱨᱮᱭᱟᱲ ᱜᱮᱫᱚ,
 ᱡᱚᱴᱮᱫ ᱛᱚᱨᱟ ᱠᱟᱱᱠᱟᱱ ᱾

 

 ᱥᱮᱛᱟᱜ ᱟᱭᱩᱯ ᱦᱤᱨᱩ ᱜᱚᱫᱚ,
 ᱜᱤᱫᱟᱹᱨ ᱦᱟᱲᱟᱢ ᱠᱚᱲᱟ ᱠᱩᱲᱤ;
 ᱛᱩᱯᱩᱱ  ᱟᱨᱩᱯ  ᱪᱟᱸᱲ ᱦᱚᱫᱟ ,
 ᱮᱥᱠᱟᱨ ᱵᱩᱡᱷᱟᱜ ᱚᱠᱟ ᱜᱷᱟᱲᱤ ᱾

 

======= ᱛ =======

 ৫।।

তুয়ু  মামা

সুচাঁদ হাঁসদা

 

তুয়ু মামা তুয়ু মামা ,
আম দ হো চেত কম জমা ৷
আঁজম এদৗঞ সিম আতকিরতে ,
একাল বাং এম কমা ৷

 

হানে দিসৗয়মে হেঁদে হেঁদে ,
সাঁডি তালেম আতকির লেদে ৷
অনা তায়ম জিতকৗর সাঁডি ,
উনি হঁয়েম আতকির কেদে ৷

 

মিত বার টাকা রজগার লৗগিত ,
সিম গেডে দ আসুল কলে ৷
উনকু ঞেঁলতে আমাঃ মচা ,
চেদাঃ মামা হো মেলে মেলে ৷

 

আমাঃ মনে দ হো মামা ,
আডি বৗড়িচ আডি নিঠুর ৷
আলেয়াঃ বুগি ভৗলৗই লৗগিত ,
মিত বেড়াহঁ কৗমিতাম উকুর ৷

 

আম সাং দ হো মামা ,
আদ তিসহঁ বালে পেড়াঃ ৷
আম সাং দ ইঞৗঃ আড়ি ,
আদো তিসহঁ বাংইঞ রড়া ৷

 

======= ᱛ =======

৬।।

আলে বাড়গে

বাড়তাঙ সরেন

 

অসার গোডা ঘাংরা
বলয়েনায় ডাংরা
হৗম্বুড় কেদায় জঁডরা
রৗগিয়েনায় চাডরা।

 

ঝৗন্টি রেগে মালহান
হরহোয়েদায় পালওয়ান
তিকিন আচুর ঢানমান
ঞেলে দুমুর ভান ভান।

 

গোডা আড়ে রৗহিড়
হয়তে লিকির লিকির
রাঃরাঃ কানায় কিকির
 উডৗও বাড়ায় ফির ফির।

 

হাণ্ডে নাণ্ডে জাঁড়ি
রুকু এদায় গাঁড়ি
তপাঃ কেদায় নৗড়ী
জরঃ খিজুর তৗড়ী।

 

মাচান রেমা হতৎ
ডুবুঃ কেদায় তরহৎ
গোটা হড়মো রদৎ
রেয়াড় রাবাং রৎ রৎ।

 

দারে চেতান পুরুল
একাল আডি উসুল
হান্তে নাতে উমুল 
তিয়ৗঃ আকুল বিকুল।

 

মিৎ কচারে বেঙ্গাড়
সিবিল রেয়াড় রেয়াড়
বাডায় গোটা পাকাড়
হাতাও আকো ধাড়পাড়।

 

======= ᱛ =======

৭।।

ভূষণ হেম্ব্রম

দুগাই টুডু

 

আঁজম আকান কাথা অনে
        অনলিয়ৗ কানায়,
আপনার চিকি লাড়াওনা করে
        লাহা হেচ এনায়।
জানাম বতঘুটু আতো রেগে
        বাঁকুড়া দ জেলা,
পছিম বাংলা পনৎ আদ
       সানাম গেকো লৗই ভালা।
ঞুতুম তায়দ ভূষন হেম্ব্রম
      হড়কো বাডায় তায়গে,
  আপাৎ কানে গনেশ হেম্ব্রম
      জত গেকো লৗইগে।
এঁগাৎ পানমুনি গেচো হানে
       আতো হড়কো লৗইগে,
মারাং চেলা বলে উনি
       গুরু গোমকে রেনগে।
অলচিকিগে পাসনাও লৗগিৎ
       আঁদোড় দহ লেদায়,
সারেঙ্গা রেদ ‘চাঁদান’ প্রেস গে
        আচ্‌গে বেনাও কেদায়।
অলচিকি লিপি প্রেস’ গে পাসেচ্‌
         পৗহিল তেনাঃ কানা,
গোটা টাঁডি নোওয়া কাথা
          তারকো রাঁওয়া লেনা।
আই.বি. খন্ডরে পার্ট টাইম গেদ
         কৗমি বল এনায়,
‘সোপোতো’ ‘লুগু লুমাং’ পাথাম
        মঁজগে সাপড়াও লেদায়,
পৗরসি সাঁওহেৎ লাহায় লৗগিৎ
       অনল অলগে পৗরি,
‘চাঁদান অপেরা’ বেনাও
‘চাঁদান অপেরা’ জোখান
      গড়য় এমলেৎ সৗরি।

বৗনুয় রেহঁ তেহেঞ অহায়
       এনেম মেনাঃ তায়া,
সান্তাড় সাঁওতা তালা মালা
        দিসৗ তাঁহেন গেয়া।

 

======= ᱛ =======

৮।।

গাতে সাঁও

সনাতন টুডু

 

হানকু তারা গাতে কুড়ি
       আড়াঃ সিদ্‌কো চালাঃ ,
আলোপে মানাঞ ইঞদ মাসে
       গাতে সালাঃ চালাঃ।

 

যুদিপে মানাঞ গাতে সালাঃ
       আড়াঃ সিদ্‌ নিতোঃ ,
বাংকো মেসাঞ এনেজ্‌ সেরেঞ
       গাতে কুড়ি ঝতো।

 

কুচি মনে উন অক্তো
        তারাল বাসালঃ তিঞৗ,
বাংকো হিজুঃ অকয় কঁহ
         মনেকো রাড়েজ্‌ তিঞৗ।

 

বাং সানাঞা একলা তাঁহেন
          মনে তিঁঞে রাগ্‌,
গাতে কুড়ি সাঁও গাতেঃ লৗগিদ্‌
          মনে তিঁঞে রাগ্‌।

 

======= ᱛ =======

৯।।

হড় লেকা

সীতেন মাণ্ডি

 

হড় লেকা হড়েম হুয়ুঃ
হড় সুর রেম তাঁহেন
রেঁগেচ তেতাং রুয়ৗ রাবাং
রৗস্কৗ মনেতেম আতাং।

 

সরগ পুরি নরক পুরি
নডে গে মেনাঃ আনা
মৗনমি জিয়ন গে বুঝৗও দাড়েয়াঃ
সুখ দুখ দ চেৎ কানা।

 

আমা ঘারঞ্ঝ আমাঃ অড়াঃ
 কুম্বৗ কুড়িয়ৗ রেঁহ
সুলুক সৗগৗইতে আমেম তলা
 তাঁহেন রৗস্কৗ রিলৗমালা।

 

অলঃ পাড়হাও গে সেঁড়া আমায়
মৗনমি লেকা বাঞ্চাঃ
অলঃ পাড়হাও গে উদু্ঃ আমায়
 আগাম রেনাঃ হর ডাহার।

 

আমাঃ আগাম আমাঃ নাগাম
 আমেম তেয়ার দাড়েঃ
হড়াঃ ঞেল তে আলম দুখঃ
 আমাঃ কৗমিরেগে মেনাঃ সুখ।।

======= ᱛ =======

১০।।

 পৗঠুওয়ৗ 

সমরলাল  টুডু

 

আমদ বাবু অলঃ কড়া
সেনঃ কানাম ইতুন আখড়া
আকিল গেয়ান হার সেঁড়া
বেরেদ কাতে সেতাঃ বেড়া ।

 

সেতাঃ উমের্  নিতোঃ আমাঃ
লাচ পটারে বৗনুঃ জমাঃ
বুরধি আকিল হুয়াম চেমাঃ
তবে খানগে রেঁগেজ দমাঃ  ।

 

কয়ঃ কাতে হর তাড়াম
রিকৗয় হুয়ুঃ আডাও কড়াম
তবে রেসে হড়ক সেঁড়াম
দুক বিপদ রেকো পেড়াম ।

 

আলোম বেঁগেদ নাতে হানতে
মিৎ মনেজিউয়ী মেঁৎ  পানতে
লাহাঃ মেসে ভৗলি কনতে
সেটেরঃ আম জ-বেলে থানতে  ।

 

অলঃ তেদো বহঃ  তুলোঃ
নাপায় তেগেম পাসকা আসুলোঃ
রৗসকৗগে জিয়োন ঝিলোরেম ঝিলোঃ
হড়ক সাবাসামা গাপা হিলোঃ  ।

 

হড়ক  লৗইয়ৗ আমদ  পৗঠুওয়ৗ
আমদরে বাং  এম  লৗঠুওয়ৗ
আমদ সৗরিগে কানাম খৗটুওয়া
অনাতেগে আলে খনেম লৗটুওয়া  ।

 

পৗঠুওয়ৗ আমদ সমাজ সুধৗর
আয়ুর কোওয়াম সানাম গিদৗর
তেয়ার কোওয়াম চিরগৗল চৌকিদার
রফায় গেয়াম দিশোমদ থানাদার।

======= ᱛ =======

১১।।

থকড়ে মচা

পিসি কিসকু

 

রাঃ মচা
আলম চেচা
থকড়ে মচা
লাচা পাচা।

 

সেরমা লিচৗ
ঞুর কুচৗ
পৗসনি রে খেচা
কিকয়ৗউ আ পচা।

 

ধিরি রাচা
রাহেড় খচা
পচ পচা
সেয়ালম বাছা।

 

রৗপুদ হুচৗ
চেলাঞ বুচা
আয়মা কেচা
বাঞ গুছা।

 

হোড়ো ভাচা
বেগাড় কচা
লুলহি ইচা
বজায়ে লচা।

 

সুনুজ ছচা
দৗড়িয়া বাছা
ঞেল কাচা
খৗজৗড়ি গছা।

 

=*= মুচৗৎ = *=