বিঞ আর আবো

 বিঞ আর আবো

ডাঃ সুরেন্দ্রনাথ মান্ডি

 

বিশেষ কায়তে দাঃ জৗপুৎ অকতে বিঞ কিদিঞ কোওয়াঃ আডিগে উৎপাৎ ঞেলঃ আ, এনতে নিয়ৗ অকতে দ অত্‌-খেত্‌ গডা-ভিটৗ, গৗডয়ৗ-ডভা, ঘাঁস-দারেনৗড়িতে গজাড় কঃআ। বাঞ্চা লৗগিৎ জিরৗওয়ঃ লৗগিৎ, আড়েভুগাঃ গাজাড় করে উকু আতে সেঁদরা-কারকা লৗগিৎতে, জানাম-বৗড় বাড়হাও লৗগিৎতে নিয়ৗ দাঃ জৗপুৎ অকতে দ আডিগে পরহওয়ালা বিঞ কিদিঞ কো লৗগিৎ। আবো মৗনমি হিনৗ-নিয়ৗ অজেতে গাজাড় করেৎ চালাঃ কৗমি-কুকৗর অকতে বিঞ-কিদিঞ কবোন জাদ্‌গো ঝাঃ লেকো খান ওনকোঠেন বো গের অচোঃআ।

বিঞ দ আডি নিরীহ জীব কানাকো। অনকা মাছা বাংকো ঞেঞেলা, হয়তে পাসনাওয়ঃ সাডে হঁ উনাঃ বাংকো আঁজমা। ওনকো জটেৎ কো সে লিলকৗর-বেজার অচ কো তেগে বিঞ দকো গেগেরা। বিঞ জে কো ফঁসফঁসা , অনাদ রৗগি তেদ বাং, আকোওয়াঃ স্বভাব তেগে। ধৗরতি জাকাত রে ৩০০০ খনহঁ বৗড়তি প্রজাতিরেন বিঞ মেনাঃ কোওয়া; ওনকো মুদরে মোটেই শায়কাড়া ইরৗল হৗটিঞ বিঞ কোওয়াঃ বিষ তাঁহেনা; মেনমা মিৎ শায় বিঞ ভিতরিরে মোটেই ইরৗল গটেন লেকা বিঞ আঃ বিষ থলিরে বিষ তাঁহেনা।

জাঁহাতিস মারাং সে হুডিঞ, বিষ আন বিঞ গেয় গের মে, জুদি নিরিখ পুরিমান বিষ এ ঢালাওয়াম আর অনা বিষ মায়ামরে মেসাঃ তবেয়ানিচ্‌ গে গগচ্‌ আ, জুদি চং ঠিক অকত নৗপিৎ তিকিছা বাং হোয়োঃ। গের্‌ ঠেন জুদি বার‍য়া ডাটা রেনাঃ দাগ তাঁহেন, তাহলেখান বুজমে বিঞ দ বিষ আনিচ্‌ কানায়। বিষ-আন আর বাং বিষ-আন যাঁহান বিঞ গেয় গের কেৎ মেসে তুরৗৎ হাসপাতাল তে চালাঃ হোয়োঃ আ।  ঞেলঃ আ, বিঞ গেরতে আয়মা হড় গেকো গুজুঃআ। নংকা হোয়োঃ রেনাঃ অজেদ নোওয়া কানা যে, লগন তে ডাকতারি তিকিছা রেনাঃ দাও বাং হাতাও আর বাংখান বতর ধাদস তে। আরহঁ ঞেলঃ আ বিঞ ঠেন গের অচ কাতে রেহঁ আয়মা হড় গেকো বেসঃ আ। নোওয়া রেনাঃ অজে দ নোওয়া কানা জে, হোয় থ গেগের বিঞ দ বিষ আন দ বাং কানায়, আর বাংখান বিষ আন বিঞ হোয় কাতে রেহঁ অনকা নিরিখ মাছা বিষ বায় ঢালাও দাড়েয়াকাদা, মেনমা Fatal dose দ বাং হোয়াকানা।

আয়মা হড় কো গে পৗতয়ৗউ, আঁধাপৗতয়ৗউ, আচার-নেমাচার লেকাতে বিঞ সাসাপ সে এনেচ্‌ কো আর বাং অঝা সখা চেতান আডিগে ভরসা কো দহয়া। ধারনা দ নংকা জে, নোকো কদ তিরয়ো অরং কাতে মানতার পাড়হাও কাতে রান-রেহেৎ জিঁ অচ কাতেৎ বিঞ কো বস্‌ দাড়েয়া কোওয়া; বিঞ ঠেন গের অচঃ রুগি,বাংখান গচ্‌ হড় কো বাঞ্চাও রুওয়ৗড় দাড়েয়াকোওয়া। অনাতে বিঞ ঠেন গের অচ লেনখান অড়াঃ হড়, গাতে, পেড়া-পৗরভৗ কদ রুগি হাসপাতালতে বাং ইদি কাতে, মেনমা নিরিখ রান বাং বেওহার কাতে পোয়লো তেগে খজ তলাস কো হাতাওয়া অঝাওয়াঃ। নংকা তেদ আয়মা ক্ষেত্র রেগে রুগি ক গচ্‌ অচ কোওয়া। আয়মা ঠেনগে নোকো অঝা কো হতেচ্‌ তেদ বিষ-বাং আন বিঞ গের হতেচ্‌তে রুগি কো বেসঃ আ, আর ওনগে ওনকোওয়াঃ হাত যঁশ সে অলৌকিক দাড়ে রেনাঃ পরচার দ হোয়োঃ তাকোওয়া। বিঞ ঠেন গের্‌ অচঃ রুগি দ বতরতে স্নায়বিক চাপতে মিৎ ঘৗড়িচ্‌ লৗগিৎ গেয়ান আৎ দাড়েয়াতাকোওয়া,মেনমা তি-জাঁগা-হড়ম কো আড়াঃ গিডিয়া, জাঁহা দ আবো গচ্‌ আকান বোন মনেয়া।

( অল আরহঁ তঁগেআ……)