সিঁগি মাহা রেনাঃ সাকাম ‘চেরেচ্ আড়াং’ লেখা- ২৮

“ আবোওয়াঃ কাথা ” ওয়েব পেজ রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com   ।

তেহেঞা আখড়ারে যাঁহায় কো সেলেদ্‌ আকান- সুজয় কুমার টুডু, রিলৗমালা মুরমু, ᱥᱩᱵᱩᱫᱤᱭᱟ. ᱢᱩᱨᱢᱩ,  ᱜᱳᱯᱮᱥᱣᱚᱨ ᱢᱟ.ᱱᱰᱤ,   ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱥᱨᱤᱠᱟᱱᱛᱚ ᱥᱚᱨᱮᱱ,  সারি ধরম হাঁসদা, বাড়তাঙ সরেন, কিষ্কিন্ধ্যা মুরমু, দুগাই টুডু, সুচাঁদ হাঁসদা, সাকম সরেন , তপন হেম্ব্রম (গসবাহা ), বিভূতি ভূষণ সরেন।

 

সুজয় কুমার টুডু, ক্লাস- I
জেলা - পশ্চিম মেদিনীপুর

রিলৗমালা মুরুমু, ক্লাস- IV
জেলা - পুরুলিয়া

১।।

ᱫᱟᱨᱮ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱵᱤᱨ ᱛᱟᱞᱟ
ᱫᱟᱨᱮ ᱱᱟᱲᱤ
ᱚᱢᱚᱱ ᱟᱠᱟᱱ
ᱟᱹᱲᱤ ᱰᱷᱟᱹᱲᱤ ᱾

ᱫᱟᱨᱮ ᱫᱟᱨᱮ
ᱯᱟᱱᱛᱮ ᱯᱟᱱᱛᱮ
ᱢᱮᱱᱟᱜ ᱠᱚᱜᱮ
ᱠᱮᱱᱮ ᱠᱚᱛᱮ ᱾

ᱫᱟᱨᱮ ᱨᱮᱜᱮ
ᱡᱚ ᱵᱟᱦᱟ
ᱧᱟᱢᱚᱜ ᱜᱮᱭᱟ
ᱡᱷᱚᱛᱚ ᱢᱟᱦᱟ ᱾

ᱫᱷᱟᱹᱨᱛᱤ ᱵᱟᱧᱪᱟᱣ
ᱡᱤᱭᱤᱭ  ᱥᱟᱧᱪᱟᱣ
ᱚᱠᱥᱤᱡᱮᱱ ᱧᱟᱢᱚᱜ
ᱡᱤᱭᱤ ᱡᱮᱞᱮᱧᱚᱜ ᱾

===== ᱛ ======

  ২।।  

ᱯᱟᱣᱨᱟ

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱦᱟᱱ.ᱠᱩ ᱛᱚᱨᱟ       ᱥᱟᱺᱬᱤᱢ ᱪᱮᱛᱟᱱ
             ᱯᱟᱣᱨᱟ ᱟ.ᱰᱤ ᱥᱟᱸᱜᱮ
ᱵᱚᱠ ᱵᱚᱠᱚᱢ           ᱨᱟᱜ ᱦᱚᱢᱚᱨ
              ᱟᱸᱫᱳᱲ ᱟᱠᱚ ᱛᱚᱸᱜᱮ ᱾

ᱦᱩᱲᱩ ᱪᱟᱣᱞᱮ          ᱮᱨ ᱞᱮᱠᱷᱟᱱ
               ᱩᱰᱟ.ᱣ ᱟᱬᱜᱚᱜ ᱟᱠᱚ,
ᱢᱤᱫ ᱥᱚᱸᱜᱮ              ᱦᱟᱞᱟᱝ ᱡᱚᱝ
              ᱥᱚᱸᱜᱮ ᱛᱟᱸᱦᱮᱱ ᱟᱠᱚ ᱾

ᱢᱤᱫ ᱛᱮᱠᱚ               ᱩᱰᱟ.ᱣ ᱪᱟᱞᱟᱣ
             ᱡᱚᱢᱟᱜ ᱛᱚᱞᱟᱥ ᱞᱟ.ᱜᱤᱫ,
ᱵᱟ.ᱫᱽ ᱵᱟ.ᱦᱟ.ᱲ      ᱜᱚᱰᱟ ᱜᱷᱩᱴᱩ
             ᱩᱭᱩᱝ ᱪᱩᱸᱰᱩᱜ ᱞᱟ.ᱜᱤᱫ ᱾

ᱩᱥᱩᱞ ᱯᱟ.ᱪᱨᱤ          ᱥᱟᱛᱮ ᱞᱟᱛᱟᱨ
            ᱴᱚᱝ ᱟᱠᱟᱣ ᱟᱠᱚ,
ᱵᱤᱞᱤ ᱠᱟᱛᱮ             ᱦᱚᱯᱚᱱ ᱠᱚᱣᱟ
           ᱥᱟᱸᱜᱮ ᱤᱫᱤᱜ ᱟᱠᱚ ᱾

 ===== ᱛ ======

 ৩।।

ᱥᱟ.ᱨᱤ ᱠᱟᱛᱷᱟ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

ᱥᱟᱹᱨᱤ ᱠᱟᱛᱷᱟ ᱥᱟᱹᱨᱤ ᱠᱟᱛᱷᱟ
ᱤᱧ ᱫᱩᱧ ᱨᱚᱲᱟ ᱾
ᱟᱭᱳ ᱵᱟᱵᱟ ᱮᱲᱮ ᱠᱟᱛᱮ
ᱵᱟᱹᱧ ᱫᱟᱬᱟᱱᱟ ᱿

ᱥᱟᱹᱨᱤ ᱠᱟᱛᱷᱟ ᱥᱟᱹᱨᱤ ᱠᱟᱛᱷᱟ
ᱤᱧ ᱫᱩᱧ ᱨᱚᱲᱟ ᱾
ᱟᱛᱳ ᱦᱚᱲ ᱮᱲᱮ ᱠᱟᱛᱮ
ᱵᱟᱹᱧ ᱵᱷᱟᱬᱩᱡ ᱠᱚᱣᱟ ᱿

ᱥᱟ.ᱨᱤ ᱠᱟᱛᱷᱟ ᱥᱟᱹᱨᱤ ᱠᱟᱛᱷᱟ
ᱤᱧ ᱫᱩᱧ ᱨᱚᱲᱟ ᱾
ᱫᱤᱥᱚᱢ ᱦᱚᱲ ᱮᱲᱮ ᱠᱟᱛᱮ
ᱵᱟᱹᱧ ᱯᱮᱲᱟᱜᱼᱟ ᱿

ᱥᱟᱹᱨᱤ ᱠᱟᱛᱷᱟ ᱥᱟᱹᱨᱤ ᱠᱟᱛᱷᱟ
ᱤᱧ ᱫᱩᱧ ᱨᱚᱲᱟ ᱾
ᱥᱚᱛ ᱪᱩᱨᱤᱛ ᱛᱟᱸᱦᱮ ᱠᱟᱛᱮ
ᱥᱟᱹᱨᱤᱧ ᱵᱤᱪᱟᱹᱨᱟ ᱿

===== ᱛ ======

 

৪।।

ᱥᱟᱱᱛᱟᱲᱤ ᱪᱤᱠᱤ ᱟᱲᱟᱝ

      ᱥᱨᱤᱠᱟᱱᱛᱚ ᱥᱚᱨᱮᱱ

( ... ᱞᱟᱦᱟ ᱠᱷᱚᱱ ᱛᱳᱸᱜᱮ)

'ᱴ' ᱛᱮ ᱜᱟᱵᱟᱱ ᱟ.ᱲᱟ. ᱺ

ᱴᱩᱠᱩᱡ᱾ ᱴᱟᱸᱰᱟ ᱾ ᱴᱮᱸᱜᱚᱡ ᱾ ᱴᱩᱸᱰᱟ.ᱝ ᱾ ᱴᱩᱶᱟ.ᱨ ᱾ ᱴᱟᱢᱟᱠ ᱾ ᱴᱤᱴᱤᱴᱮᱸᱜᱚᱡ ᱾ ᱴᱟ‌.ᱴᱤ ᱾ ᱴᱳᱴᱳᱜᱟ.ᱰᱤ ᱾ ᱴᱤᱨᱚᱢ ᱪᱮᱬᱮ᱾

'ᱴ 'ᱛᱮ ᱜᱟᱵᱟᱱ ᱟ.ᱭᱟ.ᱛ  ᱺ

ᱴᱩᱥᱤ ᱦᱟᱛᱚᱢ ᱯᱟ.ᱴᱽᱭᱟ.ᱭ ᱜᱟᱞᱟᱝ ᱮᱫᱟ᱾ ᱴᱟᱴᱽᱠᱟ ᱟᱱᱟᱡ ᱫᱚ ᱥᱮᱵᱮᱞ ᱜᱮᱭᱟ᱾ ᱴᱟᱴᱟᱱᱚᱜᱚᱨ ᱫᱚ ᱡᱷᱟᱲᱠᱷᱚᱱᱰ ᱯᱚᱱᱚᱛ ᱨᱮ᱾ ᱴᱤᱯᱚᱜ ᱼᱴᱚᱲᱚᱜ ᱫᱟᱜ ᱡᱚᱨᱚᱜ ᱠᱟᱱᱟ᱾ ᱴᱮᱨᱟ ᱢᱮᱫᱛᱮ ᱥᱟᱢᱟᱝ ᱥᱮᱫ ᱵᱟᱝ ᱧᱮᱞᱚᱜᱻᱟ ᱾

' ᱵ 'ᱛᱮ ᱜᱟᱵᱟᱱ ᱟ.ᱲᱟ. ᱺ

ᱵᱟᱦᱟ ᱵᱟᱜᱣᱟᱱ᱾ ᱵᱚᱸᱜᱟ-ᱵᱩᱨᱩ ᱾ ᱵᱮᱶᱨᱟ ᱥᱟᱠᱟᱢ᱾ ᱵᱤᱱᱛᱤ᱾ ᱵᱟᱲᱮ ᱫᱟᱨᱮ᱾ ᱵᱩᱥᱩᱵ ᱯᱟᱲᱳᱭ᱾ ᱵᱟᱯᱽᱞᱟ ᱚᱲᱟᱜ᱾ ᱵᱟᱧᱪᱟᱶ ᱰᱟᱦᱟᱨ᱾ ᱵᱟ.ᱥᱭᱟ.ᱢ ᱵᱮᱲᱟ᱾ ᱵᱳᱞᱯᱩᱨ ᱵᱟᱡᱟᱨ᱾

' ᱵ 'ᱛᱮ ᱜᱟᱵᱟᱱ ᱟ.ᱭᱟ.ᱛ ᱺ

ᱵᱟ.ᱨᱭᱟ.ᱛ ᱠᱚᱠᱚ ᱥᱮᱴᱮᱨ ᱟᱠᱟᱱᱟ᱾ ᱵᱟᱦᱟ-ᱥᱚᱦᱟᱨᱟᱭ ᱫᱚ ᱥᱟᱱᱛᱟᱲᱟᱜ ᱥᱚᱨᱮᱥ ᱯᱚᱨᱚᱵ᱾ ᱵᱤᱨᱨᱮ ᱠᱩᱞ-ᱛᱟ.ᱨᱩᱵ ᱠᱚ ᱛᱟᱸᱦᱮᱱᱟ ᱾ ᱛᱮᱦᱮᱧ ᱫᱚ ᱵᱤᱨᱥᱟ. ᱢᱩᱱᱰᱟ.ᱭᱟᱜ ᱡᱟᱱᱟᱢ ᱢᱟᱦᱟ᱾ ᱫᱤᱱᱟ.ᱢ ᱵᱟᱨ ᱥᱟᱠᱟᱢ ᱠᱟᱛᱮ ᱚᱞ ᱢᱮ᱾

(ᱛᱳᱸᱜᱮᱜᱻᱟ...)

===== ᱛ ======

৫।।

পিঁদলৗ উসৗৎ

সারি ধরম হাঁসদা

অকয় দপে এগের কেদে
             অকয় চেৎপে মেমেন?
বুসকি হৗনিয় উসৗৎ আকান
              অড়াঃ খনে ঞিরেন।

বায় আঁজমা তেতার কাথা
              বায় রেবেনা রুয়ৗড় ,
 অৗড়িস কাতেয় পাঁজা বাড়ায়
              বাড়গে লাটা উগৗড়।

বায় রেবেনা গাতে সালাঃ
              বাহা গালাং গুতু ,
 বৗগি কেদায় ইসিন আরো
                জম ঞু দাকা উতু।

 গাজাড় খনাঃ আঁজম হিজুঃ
                বতর আড়াং 'খে-খে' !
 বুসকি হৗনিয় পিডগৗও হেজ এন
                বাখোল অড়াঃ কঁড়তে।

===== ᱛ ======

৬।।

জানাম দিশম

বাড়তাঙ সরেন

 দারে নৗড়ি বির বুরুতে

         পেরেচ জানাম দিশম
চেঁড়েঁ চৗপড়ি চেরবেরো
            সারি সোনা দিশম ।
 
তারব তিরিল জ বিলিতে
                  পেরেচ ঝুনুক ঝুপুর
 এদেল মুরুৎ জেঁগেৎ জেঁগেৎ 
                  ডৗরমা সুপুর সুপুর ।
 
 গাঙ্গা গাডা দাঃ দরেয়া 
            আতুঃ লেগেম লেগেম
জজ ঝারনা কিয়ৗ ডাডি 
             দাঃ দ আডি হেড়েম।
 
  গুহুম হুড়ু আরজাও রেদ
                       ঝত বয়হা কৗমি 
সুলুগ সৗগৗই আডি নাপাই
                  দৗই হিলি সাঁও মৗমি।
   
পরব পৗলি গুবুড গুবুড
                  রৗশি আতো তালা
কুড়ি কোড়া এনেচ সেরেঞ
                    রৗস্কৗ রিলৗমালা।
 
রেঙ্গেচ তেতাং সেরমা সিতুং
              একাল বাং ইঞ বাতাও
জানাম দিশম যতন রেদ
                  সানাম গেচঞ সাহাও।
 
দুলৗড় তিঞৗঞ  আয়ো বারাং
                       ইঞাঃ জানাম দিশম
রানে ভানেঞ সাজাও তিঞৗ   
                      ইঞাঃ সোনা দিশম।

===== ᱛ ======

৭।।

হেওয়াঃ মে 

কিস্কিন্ধ্যা  মুরমু 

সেতাঃ তরা বেরেৎ কাতে 
 দাঃ দৗতৗনি  জম  কাতে 
        অল পাড়হাঃ কৗমি এহবমে ।
 
খেলোড যখচ্ খেলোড কাতে 
দাঁড়ান যখচ্ দাঁড়ান কাতে 
           লগন অড়াঃতে রুয়ৗড়মে  ।
 
 সারদি সিতুং বাং কাতে 
 রেয়াড় রাবাং বাং কাতে 
            আমতে নাপায় তাঁহেনমে  ।
 
মারাং কদ মানাও গুনৗও কাতে 
হুডিঞ কদ আমিচ্ উইহৗর কাতে 
                    গুন মানাও চেমেৎমে ।
 
 এড়ে  কাথা  বাং লৗয় কাতে 
সৗরি কাথা লৗয় সেঁড়া কাতে 
            সানাম সাঁও কাথা দ রড়মে । 
 
 সুয়ৗ সিড়ৗং বাং বেওহার কাতে 
 নৗয় নাপায় মজ্ রড় রপড় কাতে 
                মনে জিৎকৗর সেঁড়ায়মে ।
 
সানামগে মিৎতে গাপাতে কাতে 
সামাং  হরতে  তাড়াম  কাতে 
             সামাং সেন দেলা লাহাঃমে ।
 
অৗড়িস বেজার এতম কাতে 
লামট হড়ম সাঁওয়ার কাতে 
              কৗমি হঁ সাঁওতে সেঁড়ায়মে ।
 
ঞেল উরুম বুঝৗউ কাতে 
যত হড় সাঁও গাপান কাতে 
              চুরিত বেনাও হেওয়াঃমে ।

===== ᱛ ======

৮।।

সিঞ চাঁদো

দুগাই টুডু

হৗনিয় ঞেলঃ সিঞ চাঁদো

           হানে পুরুব নাখা,
পিরিৎ পিরিৎ রাকাপ্‌ কানা
            ডাব্‌রা থৗরি লেকা।

আঁগা পায়ার চেরো বেরো
        রাগ্‌গে আদ চেঁড়ে,
বেরেৎ তরা গিদ্‌রৗ দকো
        রড়া কেঁড়েচ্‌ দঁড়ে।

সৗরদি সিতুং দারে বুটৗ 
        দমে উসুল বাড়াঃ,
ঝিলি মিলে চাঁদো ডুবুচ্‌
        ঞেলঃ আয়ুপ্‌ বেড়া।

চেঁড়ে চুপড়ুৎ লাঁগা জিরাঃ
        রুয়ৗড় কানা ডেরা,
গিদ্‌রৗ কোদ জৗপিৎ গদা
       হানে ঞুহুম্‌ তোরা।

===== ᱛ ====== 

৯।।

গুনু পুসি

সুচাঁদ হাঁসদা

এ  গুনু  গুনু ,
আম গগ বাং নুনু ,
চেদাঃ তবে মিয়ুং মিয়ুং ,
টুকুচ চেলাং এম উয়ুং ৷

দিনগেম পাঁজায় সুসি ,
অনা তেগেকো মেতাম পুসি ,
জিল হৗকুম ঞেঁল লেখান ,
আমদ আডিম কুসিঃ ৷

===== ᱛ ======

১০।।

আপে গে

সাকম সরেন 

ডিগিমিগি বেড়ায় রাকাপ্ 
ঞেলঃ মারশাল আহলা, 
বৗবু মৗই মা লগন --
বেরেৎ পে দেলা। 

দৗতৗনি আব্ হুতুম কাতে 
জমপে বাস্কে মৗডি, 
দুড়ুপ্ পে অলঃ পাড়হাও 
অৗকিল আরজাঃ অৗডি। 

সেতাঃ সিঁগৗড় দিনৗম 
পাড়হাঃ পে দুড়ুপ্ একাল, 
রিকিড়় রিকৗ ধিরজৗও 
মুরুখ্ মনেয় মারশাল। 

আপে গে আগাম লৗউড়িয়ৗ
সানতাড় সাঁওতারেন, 
জৗত্ ,সাঁওতা লাফাংসেৎ 
সোতোঃ ইদিতেন। 

===== ᱛ ======

১১।।

কুহু কুইলি

 তপন হেম্ব্রম (গসবাহা)

                  

   চৗত বৗইশৗখ সিতুং আলাঝালা
   সৗরদি তিকিন বেড়া, 
   কুহু কুইলি মিরু আড়াং
  রাওয়াও এনা, গোটা বীর বুরু ধাসনাঃ ।

   আমাঃ কুহু কুইলি হহ আড়াং
   লতুর কিনরে তাকের অৗদিঞ,
   মনে জিউয়ী তিরপিতৎ ইঞ অৗইকৗও
   গাতে, উকু দানাং আমদ অকারে ।

   আমাঃ কুহু আড়াং আঁজম সাঁওতে
   রৗস্কৗ সালাঃ ইঞ হঁ, কুহু বুঝৗও ইঞ,
   আলম রৗগিঃ, আলম বেজার অৗড়িসঃ
   আম সাঁওতে গাতেঃ বুঝৗও ইঞ ।

  সৗরদি তিকিন বেড়া,নিচল নিঝুম অৗইকৗঃ
  সিতুং টাটওয়াস মনে,কৗহুল বৗকুল বুঝৗঃ,
  অকয় দানব জেন সেটের আকান লেকা
  বতর অৗইকৗঃ সারা সৗরদি তিকিন বেড়া ।

    ভর তিকিন অকতে, আমাঃ কুহু কুইলি আড়াং
    গোটা বির পাকাড়রে , তাকের লেনতে
     সানাম কওয়াঃ মনে হড়ম জিউয়ী
     রাওয়াল লেন, কুহু কুইলি আমাঃ কুহু আড়াং কতে ।

===== ᱛ ======

১২।।

সেঁগেল 

বিভূতি ভূষণ সরেন 

 

সেঁগেল আতে    আলম খেল 
          সেঁগেল লল গেয়া ,
সেঁগেল সঁগে     খেল রেদ 
           গগয় এগের মেয়া। 

গগয় মেনা    সেঁগেল রেদ 
         সানাম লঃ তরজঃ, 
অনাতে মেতাম   বাবু 'সেঁগেল'
         অনাদ আলম গরজঃ। 

সেঁগেল রেদ      জাংহঁ জাং 
       আলম আজান বাজান, 
আরহঁ ঞেলঃ     ধিরিহঁ ধিরি 
         সানাম গেতয় হাজাম। 

ইরিচ্ চিকি     বাজরা আতা 

        সেঁগেল রেদ বাং ,
কাথাক বাম   আঁজম লেখান  
        সেঁগেলতে লঃ আম ।

********মুচৗৎ *********