আবোওয়াঃ ওয়েব পেজ- আদিবাসী হড় হপন দ বির-বুরু ধারে ধারেতে সেদায় অৗগিল হাপড়াম খন গে জিয়ন কো খাঁডাও আগুয়েদা। অনালেকাতে বির-বুরু দ ওনকো ঠেন আডি আপনারগে সে মিৎ বঁগা বারাক গে। সেদায় খনগে বির-বুরু রেনাঃ রহড় সাহান, সাকাম, জ-বেলে এমান আগু কাতে সংসার কো চালাও আগু আকাদা। বাহা-সহরায় রেহঁ বির-বুরু খন সাকাম আগু কাতে বঁগা বুরু দেবা সেবা খন এহব কাতে পিঠৗ লাঠা লেকান কৗ মি হরা কো পারম আগুওয়াকাদা। বাডায় আকানা তিসহঁ বির-বুরু চেতান নাহাচার বাংকো কৗমিয়াকাদা বরং কো জতন জগাও আগুওয়াকাদা।
মেনখান উনৗ সেরমা পারম কাতে আচকাগে পারমেন ২৩ ডিসেম্বর হিলোঃ পুরুলিয়া জিলৗ রেনাঃ পাঞ্চেৎ বুরু খন যাও সেরমা লেকাগে নেসহঁ সহরায় রেনাঃ সারজম সাকাম আগু চালাও লেন তিরলৗ কো ফরেস্ট গার্ড ঠেন ২ ঘন্টা চেতান কো আটক অচোয়েনা। বাডায় আকানা এখেন আটক উতৗর সুমুং দ বাংআ, ওনকো ঘানে ঘানে অড়াঃ রুওয়ৗড় মেন কাতেহঁ পারাংগত বাংকো ঞাম আকাদা। এমন চেৎ ওনকো সালাঃ অকয়হঁ বাংকো ঞেপেল অচোওয়াকাদ্ কোওয়া। নঁতে আরহঁ নোওয়া কাথাকো যাঁহায় ঠেন সদর লেখান ওনকো ঞুতুমতে থানারে এফ.আই.আর.রেনাঃ হুমকি হঁক এম আকাদ্ কোওয়া। নোওয়া কাথা আঁজম কাতে ভারত জাকাত যুওয়ৗন মহল রেন জেলা সভাপতি আর সমাজ সুসৗরিয়ৗ মানতান রাজেন টুডু ঞির সেন কাতে ওনকো তিরলৗ কো আড়াঃ রেনাঃ এ বন্দেজ কেদা। আরহঁ বাডায় আকানা ফরেস্ট গার্ড কো বুঝৗও রেনাঃ এ রিকৗ কেদা বাংমা আদিবাসী সাঁওতে যুগ যুগ ধরিয়ৗ গিরৗবাস হেচ্ আকান বুরু হড় কো ‘বুরু আইন-২০০৬’ মোতাবেক লেকাতে আদিবাসী কোওয়াঃ আইদৗর মেনাঃ আকাদা যে বির-বুরু খন ‘নন টিম্বার প্রোডাক্ট’ মেনেৎ সাকাম, রহড় সাহান, বাহা এমান তেনাঃ আগুয় রেনাঃ। নোওয়া বুরু আইন কাথা আঁজম কাতে বীট অফিসার আঃ মনে হুয়েন তায়া বাংমা রাজেন টুডুদ সরকারী কৗমিরে জাঁগেদারাম এদা। এমন চেৎ উনি বিরুধরে থানারে এফ.আই.আর.রেনাঃ হুমকি হঁয় এম কেদা বীট অফিসার।
আদিবাসী কো চেতান নংকান ঘটন রেনাঃ কৗডরৗই রড়দারাম, আদিবাসী কোওয়াঃ আইদৗর টেকাও দারাম আর বুরু আইন-২০০৬ বাঞ্চাও দহয় লৗগিৎ দারায় কান ২৯ ডিসেম্বর, তিকিন ১২ টাড়াং অক্তে পুরুলিয়া জিলৗ নিতুড়িয়া থানারে হেনাঃ গোবাগ মোড় সোর টাঁডিরে মিৎ এদ্রে জমেলায়ে হহ কেদা ভারত জাকাত মাঝি পারগানা যুওয়ৗন মহল। অনারে আদিবাসী সমাজরেন সানাম লেকান দরদিয়ৗ আর সুসৗরিয়ৗকো সহর সেটেরঃ লৗগিৎ যুওয়ৗন মহল আরদাশ এ দহ আকাদা মেনতেহঁ বাডায় আকানা।
.webp)
.webp)
