কিস্কিন্ধ্যা মুরমু - আয়মা দিন করোনা লেকান আজারতে দিসম দুনিয়ৗ রেনাঃ কৗমি কৗসনি থুকুম লেনা। মেনখান অকত বিতৗঃ সাঁও সাঁওতেগে অনলিয়ৗ অনড়হিয়ৗ আঃ সাঁওহেৎ সৃজৗও কৗমিহরা বাং থির তাঁহেলেনা। সৃজন কৗমিহরা উতৗহুলি সারসাও আকানা। নংকান হালৎরে অনলিয়ৗ অনড়হিয়ৗ কো জুগুৎ জুমিৎ কাতে অনলাইন ভার্চুয়াল তালাতে সাঁওহেৎ চার্চায়েৎ তাঁহেনা। সাঁওহেৎ চার্চাগে পারমেন ২৯ ডিসেম্বর মতব মুলুক সাঁওহেৎ মাডের গড়রে আদিবাসী কালচার সোসাইটি দ সাঁওহেৎ সাঁওতে লাকচার আখড়ারে নাওয়া মারে অনলিয়ৗ অনড়হিয়ৗ আতে কুরুমুটু লেদা সামাং দুড়ুপ মিৎ কাতে সাঁওহেৎ আর লাকচার আখড়া। গিধনী ইতুন আসড়া বদলতে কমিউনিটি হলরে হুয় সৗরিয়েনা। বৗসিয়ৗম গেল বাজাঃ খন ঞুহুম ধৗবিচ।
মারাং পেড়া লেকাতে সেটের এ তাঁহে কানা অনলিয়ৗ মানতান খেরওয়াল সরেন।
মৗনৗন পেড়া লেকাতে মানতান অনিল কঁয়ডা ( সেরেঞ রুসিকা ) সাঁওতে মোহন চন্দ্র বাসকে লক্ষন কিস্কু দূর্গা প্রসাদ হেমরম, কুহু দুলৗড় হাঁসদা, মানিক হাঁসদা দ্বিজপদ হাঁসদা গংকে তাকো।
সাঁওহেৎ চার্চাও আখড়ারে আপনারাঃ অল অনড়হেঁ পাড়হাও আঁজম কেদাকো অনড়হিয়ৗ নিরঞ্জন হাঁসদা, হৗরয়ৗড় বাদোলি, চিন্ময়ী মারানডি, গুহিরাম কিস্কু, রোহিনাথ চপেয়ার, বাবলু সরেন, কিস্কিন্ধ্যা মুরমু, নেতাই টুডু, রাজীব মুরমু,মহেন্দ্রনাথ সরেন,নিরঞ্জন কিস্কু, দুর্গা সরেন আর কৗহনী কিন লৗই কেদা লক্ষীনারায়ণ হাঁসদা, অতুল হাঁসদা।
জানাম পৗরসিতে সাঁওহেৎ সুমুং দ বাং বাংলা পৗরসিতে আপনারাঃ অল অনড়হে পাড়াও রেনাঃ হঁ আরিবৗধি তাঁহে কানা। অনড়হিয়ৗ কো তাঁহেকানা মানতান মানবেন্দ্র পাত্র, মনোজিৎ মাইতি, মিতু মাইতি, শিল্পী মুখার্জী, সোমনাথ সাউ, জয় স্যন্যাল, অমিত মাহাত, হারাধন জাল, গোপীনাথ মুখার্জী , দেবাশীষ দাস সাঁওতে সানতালি বাংলারে সাঁওহেৎ দুলৗড়িয়ৗ।
আখড়ারে সাঁওহেৎ সাঁওতে লাকচার এনেচ সেরেঞ হঁ ঞেল ঞামেনা। সেরেঞ লেকাতে তাঁহেকানা কো জানকী নাথ হাঁসদা, স্বরগ হেমরম, করন হেমরম, দুলাল হেমরম, সাঁওতে লাকচার এনেচরে আমড়াতড়া সাড়পা এনেচ রুসিকিয়ৗ কুড়িকো। মামড়দা লাঙড়ে এনেচ কড়াকুড়ি, গিধনী আদিবাসী সাড়পা এনেচ রুসিকিয়ৗ ,আর ফাগুয়াশোল রেন পৗঠুওয়ৗ মৗই বাবু তাকো।
আখড়ারে তুমদৗ টামাক আতে পেড়া দারাম তালাতে কৗমিহরা এতহপ এনা। মারাং পেড়া সাঁওতে মৗনৗন পেড়া আতাং দারাম তায়নম অনড়হিয়ৗ পৗয়ুল জুঝৗর সরেনাঃ জানাম মাহারে জহার চাল কাতে অনড়হেঁ পাড়হাও আখড়া লাহায়েনা। সুর সৗগিঞ খন সেটেরাকান সাঁওহেৎ দুলৗড়িয়ৗ সানাম ক লৗগিৎ সড়ে দাকা রেনাঃ বনধেজ দহ লেনা ।
মারাং পেড়া মানতান খেরওয়াল সরেন লৗই কেদা "অৗডি রৗসকৗ আর গরব রেনাঃ কাথা সাঁওহেৎ আখড়া সাপড়াও আকানা। অনলিয়ৗ কদ বঙ্গাকান গেয়াকো উনকুয়াঃ লৗয় তাঁহেঞ বাংরেহঁ হাপেন রেদ সৗরিগেয়া। অনড়হেঁ কৗহনী তালাতে সালগাও আবোন কানা।
সেচেৎ ডাহারতে ডাহরাওয়েৎ বনা। মৗঝি জগমৗঝি গডেৎ পারানিক দুড়ুপ মিৎ কাতে সেচেৎ লৗইতে গাপালমারাও মাবন। সাঁওতারে লাসের হাতাং পৗঠুওয়ৗ বন তেয়ার কোওয়া সেচেৎ রেদ এটকে টঁড়ে তাঁহেন রেহঁ লাহা লাগাও বনা। "
মাডের রেন সাসাপড়াওয়িচ লেকাতে মানতান বৈদ্যনাথ হাঁসদা লৗই বুটৗ কেদা "আয়মা চাঁনদো আনলাইন ভার্চুয়ালতে অনড়হেঁ পাড়হাও হুয়ুঃ কান তাঁহেনা। অনা লেকাতে তেঁহেঞ সুর সামাং ঞাপাম উপরুমঃ লৗগিৎগে আখড়া জড়াও কুরুমুটু। অনলিয়ৗ কো উদগৗঞ ঞাম লৗগিৎ মৗন সাকাম চাল আকো হুয় এনা সাঁওতে নওয়া আখড়া খন নাপায় ভাবনা পাঁজা ঞামগে আসল যস। বৗবু মৗই তাকো ঞেল শিখনৗৎ কাকো। "
আখড়া চাচলাওরে তাঁহে কানায় আখড়া বৗইসি গড় সাপড়াওয়িচ মানতান জীবন কৃষ্ণ সরেন।
.webp)
.webp)
