(হুডিঞ কৗহনি)
সৗরি সহরায়
--বাড়তাঙ সরেন
হানে তিস রেচং গুড়ধু আর গুডমো তৗকিনাঃ তাপাম খৗপৗরি হুয়লেনা। গ-বাবা বঙ্গাতালা তায়ম বাড়গে সীমৗ সং হৗ টিঞ অক্তে বার পে মকা জায়গা লৗগিৎ মিৎবার কাথাতেগে কাথা দ আডি মারাং সেচ লাহালেনা। রপড় ঝগড়, তাকাচ তৗকিচ খন লৗড়হৗয় তাপামরে কাথা দ মুচৗৎ লেনা। এন হিলোঃ খনগে বার বয়হা ভিতরিরে রড় লান্দা চাবালেনা। বারয়া ঘারঞ্জরে হিজুঃ সেনঃ মুচৗৎ লেনা। বৗয় বৗয়তে বারয়া বাখোল রাচা খন বাড়গে মুচৗৎ ধৗবিচ উসুল উসুল পাঁচির হঁ তেয়ার রাকাপ এনা। মেনখান নংকা হুয়ুঃ কাথা দ বাং তাঁহেকানা।
সাড়হাটোলা লাড়গা পারগানা দ মিৎ মারাং কিঁষাড় হড়ে তাহেঁকানা। আয়াঃ খেত হাসারে সেরমা ভর গেল বার গটেচ কৗমিয়ৗকো কৗমিরে জপড়াওকো তাঁহেকানা। বাখোল রাচারে পে পে গটেচ হোড়ো বাখার দ তল আর তলরেগে তাঁহেকানা। বাড়গে নাখারে সেরমা জাদগো তিয়োঃ লেকা উসুল উসুল পেয়া বুসুপ চৗকি তাঁহেকানা। লাড়গা হাঁসদারেন বারয়া হারা জুয়ৗন কড়া গুড়ধু আর গুডমো ; বানার কড়াগেয় বৗহু আকাৎ কিনা। মিৎ কাথাতে মেন গানোঃ আ, লাড়গা আর কুশবী তৗকিনাঃ হাঁসদা বাখোল দ সৗরিগে মিৎ রিলৗমালা ঘারঞ্জ তাঁহেকানা। নংকান মিৎ ঘারঞ্জ বৗ গি ওটোকাতেঃ লাড়গা দ আচকাগেয় হানাপুরীয়েনা। বাংমা আচকাগে কড়াম হৗসুতেয় হানাপুরীলেনা। কুশবী দ দুক বাং সাহাও লেৎতে তুরুয় চাঁদো তায়ম উনি হঁ জুরিতায়ে পাঁজা লিদিয়া।
আয়ো বাবা হানাপুরী তায়মগে গুড়ধু আর গুডমো দ খেত হাসা হৗটিঞ কাতেঃকিন জুদৗলেনা। লাড়গা পারগানা দ বুদ আকিলান হড়ে তাঁহেকানা। অনাতে গুরুঃ লাহারেগে বার বয়হা সমান সমান খেত হাসায় ঞেল চিয়ৗও ওটোয়াৎকিন তাঁহেনা। মেনখান এঁটকে টঁড়ে দ সিরজৗও লেনা একেন অনা বার বিঘৗ বাড়গে লৗগিৎ। আর অনারে সেঙ্গেলকিন উসকুর লেদা বার ঞাঁতায়া। গুড়ধু আর গুডমো এরাৎতেৎ তৗকিন খৗতির গে বার বয়হাওয়াঃ সিবিল সৗ গৗই দ হাড়হাৎ উতৗর লেনা। গিদৗর পিদৗর ভিতরী রেহঁ রড় লান্দা বাং তাঁহেকানা।
তেহেঞ বারগেল মিৎ সেরমা তায়ম বার বয়হারেন সানাম কড়া কুড়িকো সেটের আকানা আতো দিশমতে। দিশমরে 'লকডাউন' খৗতির কলেজ হোষ্টেলকো সানাম বন্দ আকানা। অনাতে নেশ সহরায়রে সানামগে এনেচ সেরেঞ ঞেল রেনাঃ দাওকো ঞাম আকাদা। সাড়হাটলা রৗশি আতো কুলহীরে কড়াকুড়ি সহরায়কো এনেচ কানা আডি জমক আতে। আয়মা হড়লেকাগে গুডমো আর গুড়ধু হঁ কুলহীরে ওডোং কাতেঃ এনেচ সেরেঞকিন ঞেলেৎকান তাঁহেনা সাঙ্গিঞ খনগে। আচকাগে তুমদাঃ রু রু কিন কড়া ঞেলতে গুড়ধু আর গুডমো দ মেৎ ইতকিৎ কিন ধুরৗও এনা। আকিনাঃ পো-পোন গটেচ মেৎ বাংকিন পৗতয়ৗও দাড়েয়াঃকানা। মচতেকিন কয়ঃকেদা। হেঁ, হেঁ, সৗরিগেকিন ঞেল এদা। গুড়ধু হপন মারশাল আর গুডমোরেন কড়া রিমিল তৗকিন দ সাজবাজ কাতেঃ এনেচকুড়ি সামাংরে তুমদাঃকিন রুরুকানা খেঞ্চের খেঞ্চের আতে। আর আকিন বার বয়হারেন বারয়া কুড়ি, বাহা আর কুনৗমী তৗকিন দ এনেচ কুড়ি সাঁওতেকিন এনেচকানা। গুড়ধু আর গুডমো তৗকিনাঃ পোন মেৎরে মেৎদাঃ সারসাও ওডোংএনা রৗস্কৗতে। এনেচ কড়াকুড়িকো লাহা হেচ এনা। মারশাল আর রিমিল দ আচকাগে আকিন বাবা তৗকিন তুমদাঃকিন গঃ আৎ কিনৗ। গুড়ধু আর গুডমো দ চেৎ কিন চেকায়া নিতং! বাংকিন 'বাং' দাড়েয়াদা। তুমদাঃ গঃকাতেঃ বার বয়হা রু-রু কিন ধুরৗও এনা। সেদায় লেকা খেঞ্চের আতে আডি জমকাও আতে তুমদাঃকিন রুয়েদা গুডমো আর গুড়ধু। রৗস্কৗ তে পোন বয়হা কড়াকুড়িওয়াঃ মেৎ খন টড়ঃ টড়ঃ মেৎ দাঃ জরয়েনা। তুমদাঃ টামাক গুবুড গুবুড আর সহরায় সেরেঞ রাহাতে সাড়হাটোলা রৗশি আতো দ আঁদোড় উতৗর এনা।
.webp)
