বিরসা মুন্ডা দিসৗতে
মহাদেব হাঁসদা
দিসম রেন জুমিদার, মহাজন, আর সাহেব সুবৗ কোওয়াঃ রডচ্, কচলন, নাহাচার আর সিঁয়াজৗরি খন দুগঃ লৗ গিৎ আপনারা হক্-আইদৗরি আর বে-তাবেতেৎ ঞাম রুওয়ৗড় লৗগিৎ ,জাঁহায় দ আপনার জিওয়ি হড়মো কো আলায় আকাৎ- অনকান মিৎ বীরবান্টা দ কানায় বিরসা মুন্ডা। উনিদ আদিবাসী কোওয়াঃ অন্তররে “ধৗরতি আবা” লেকাতে ঠাঁও এ ঞাম আকাদা।
১৮৭৫ সাল রেয়াঃ ১৫ নভেম্বর, বিরসা মুন্ডা দয় জানাম লেনা রাঁচি জেলা রেয়াঃ তামাড় থানারে মেনাঃ উলিহাতু আতোরে। অনা তায়ম উনি দয় হারালেনা চালকাদো আতোরে। আচ্ বাবা আঃ ঞুতুম দ- সুগনা মুন্ডা আর আচ্ আয়ো দ কারমি মুন্ডা। বিরসা তেকো দ পে বয়হা- কমতা,বিরসা আর কুনু; অনকাগে মিস এরা দ বার হড়- দাসকি আর চাম্পা। ওনকো দ আডিগে রেঁগেচ্ হড়। কিঁষৗড় হড় ঠেন কৗমি কাতেৎ, বির-বুরু রেয়াঃ জ-বাহা, দাঃ, আড়াঃ সাকাম জম কাতে দিনকো খেমাও এৎ তাঁহে।
বিরসা দ গিদ্রৗ অক্তে আচ্ মামা অড়াঃ আয়ুভাতুতেয় সেন লেনা। অনা বেগর কৗকি গ ঠেন খাটাংগা আর অনা তায়ম দ আচ্ দাদা ঠেন কুন্দরি বড়তলি আতোতে। নংকা কাতে হাঁডে নাঁডে তাঁহে তাঁহেতে- এটাঃ মুন্ডা গিদরৗ কো সাঁও মেরম ভিডি গুপি গুপিতে তিরিয়ো অরং অরংতে বিরসা দয় হারা লেনা।
তাক দ মিৎ দিন বুরজু লোওয়ার প্রাইমারী স্কুল রেকো ভুরতি কেদেয়া বিরসাদ। গিদরৗ খন গে উনিদ আডি লাসের হাতাং আনিচ্ এ তাঁহে কানা। অনাতে উনিদ চাইবাসা জার্মান মিশন স্কুল রেকো ইদি কেদেয়া। অনাদ তাঁহেকানা ১৮৮৬ সাল। অঁডেনা নিয়ম লেকাতে বিরসাদ ইসৗই ধরম হাতাও হোয় এন তায়া। ঞুতুম এনায়- বিরসা দাউদ। অনাদ আপার প্রাইমারী স্কুল তাঁহেকানা। নংকা কাতে বিরসা দ হিন্দী সাঁওতে ইংরেজী হঁ বেশ গে চেৎ লেৎ তাঁহেনা।
মেনখান আডি উসৗরা গে উনিদয় বুজ তিয়োঃ কেদা- দিশম রেন জুমিদার, মহাজন, পুলিশ দারোগা আর সাহেব সুবা দ বেশ হড় বাং কানাকো। ওনকোওয়াঃ রডচ্, কচলন্ আর সিঁয়াজৗরি হতেতে মুন্ডা কদ আকোওয়াঃ অত্ হাসা কো রেচ্ অচো কানা। বহঃ রেয়াঃ উদ্গৗর দাঃ জাঁগারে জর কাতে জাঁহা ধন দুরিব কো আরজাও এদা- অনাদ আডিলেকান ফেরকৗটিতে ওনকো সেয়ান হড় ঠেন কো সিবোড় অচোঃ কানা।
তাক দ মিৎদিন চাইবাসা মিশন রেয়াঃ গির্জারে কয় জং (প্রার্থনা) জখেচ্ অঁডেনিচ্ মিৎ সাহেব এ মেন কেদা- “ মুন্ডা সর্দার দ জত’গে ঠগ্, জোচ্চোর কানাকো”। খান বিরসাদ বায় সাহাও দাড়েয়াদা। রড়-রুওয়ৗড় কেদায়-“বাং আ, ঠগ্ দ বাং কানাকো,জোচ্চোর হঁ বাং”। বিচ্কম সাহেব কো জুমিদার কো মহাজন কোগে ‘ঠগ্’কানাকো। ওনকো গে মুন্ডা কদ কো এড়েয়েৎ কোওয়া।
নংকান কাথা রড় হতেতে বিরসা দ অনা স্কুল খন কো অডং বাহের কেদেয়া। সেনঃ জখেচ্ বিরসায় মেন কেদা- মিশন রেন সাহেব আর অফিস রেন সাহেব- জত কো মিৎ গেয়া-“ সাহেব সাহেব এক টোপি হ্যায়”। অঁডে খন অডং কাতে বিরসা দ আচ্ মারাং দৗই দাসকি ঠেনে সেন এনা। অন্ডে মিৎ কিঁষাড় অড়াঃরে গুতিয় তাঁহেয়েনা। মেনখান মিৎ এশা মনে জিওয়ি দ উলৗট কাছাড়ঃ তায়া সমাজ রেন হড় লৗগিৎ। মিৎ দিন আদ বন্দগাঁও তে চালাও এনা। অন্ডেরেন জুমিদার জগমোহন সিং রেন মুনসি আনন্দ পাঁড়ে ঠেন বৈষ্ণব ধরমে হাতাও কেদা আর পে সেরমা উনি সাঁওতে তাঁহেয়েনা। মেনখান অন্ডেহঁ জিওয়ি দ বাং থিরলৗ লেন তায়া। মুন্ডা কোওয়াঃ দুক্ দসা ঞেল কাতে বিরসা আঃ জিওয়ি দ মিৎ এসা লঃ তায়া। খান এতহব এনায় সমাজ সুসৗর কৗমি।
(অনল তঁগে আ)
.webp)
