কিস্কিন্ধ্যা মুরমু, আযোদিয়ৗ- অনলিয়ৗ দ সাঁওহেৎ হারাবুরু রেন লৗউড়িয়ৗ। সাঁওতা জিওয়েৎ জিয়ন রেনাঃ কাথা গালাং কৗরিগল কানাকো। জুয়ৗন অনলিয়ৗ সৗহিজুহিতে সাপড়াও লেন ২৫ ডিসেম্বর 'অনলিয়ৗ সাঁও ঞাপাম ' আখড়া দ আয়োদিয়ৗ বুরু চট ছাতনি অৗতু রেনাঃ আদিবাসি পল্লী উন্নয়ণ সংস্থা রাচারে ঞাপাম মিৎ এনাকো। ওড়িষ্যা, ঝাড়খন্ড আর বেঙ্গলরেন পৗরসি দুলৗড়িয়ৗ কো সেটের ঞাপাম লেনা। আখড়ারে নেঁওতা পেড়া লেকাতে সেটের কিন তাঁহে কানা প্রফেসার মানতান ডঃ রতন হেম্ব্রম আর "তারওয়াড়ে " পাথাম সাসাপাড়াওয়িচ অনলিয়ৗ অনড়হিয়ৗ মানতান দাশরথি মৗঝি (সেঙ্গেল মারমার) সাঁওতে "সারজম উমুল " পাথাম রেন সাসাপাড়াওয়িচ অনলিয়ৗ মানতান গনেশ মারানডি, "পাঁজা" পাথাম রেন সাসাপাড়াওয়িচ অনলিয়ৗ মানতান শ্যামসি টুডু, "দিল্লী দরবার " পাথাম রেন সাসাপাড়াওয়িচ মানতান প্রেম সরেন সাঁওতে আয়মা অনলিয়ৗ অনড়হিয়ৗকো।
অনলিয়ৗ সাঁও ঞাপাম আখড়ারে অনলিয়ৗ কোওয়াঃ নাওয়া পুঁথি পতব হঁ উঢৗওয়েনা। হাজাম বাস্কেয়া পোইলো পুঁথি 'পি.ও বোডিং-আ জিয়ন কাথা ' ,দসার দ 'সাঁড়েস পতব'। অনা সাঁওতে মানতান দাশরথি মৗঝিয়াঃ পতব 'গেরাং' ,গনেশ মারানডি আর দূর্গাদাস মুরমু তৗকিনা সাপড়াও পুঁথি 'সানতাল পরগনা রেন পিয়ো চেঁড়়ে '। অনলিয়ৗ ঠেনখন বাডায় ঞাম এনা বাংমা উঢৗও আকান পুঁথি পি.ও বোডিং আ জিয়ন কাথারে বোডিং সাহেবাঃ জিয়ন লৗইতে অল আকানা।
সাঁড়েস পতবরে সাঁড়েস ইদি কাতে অলতল আকানা। সাঁড়েস রেনাঃ কাথা সাঁওতা মৗনমি আর পৗঠুওয়ৗ কো যাতে বাডায় ঞাম দাড়েয়াঃ। 'গেরাং' পতব রেদ অনলিয়ৗ আঃ গৗহির ভাবনা মেনাঃ আকাদা। অনড়হেঁ পতব রেদ অনড়হেঁ তালাতে মৗনমি কোওয়াঃ হৗসু জলন হারখেৎ নাহাচার রেনাঃ কাথা মেনাঃ আকাদা। ' সানতাল পরগনা রেন পিয়ো চেড়ে' পতব রেদ সানতাল পরগনা রেন জুয়ৗন অনলিয়ৗ পৗঠুওয়ৗ কো পাড়াও কাতে উদগৗও ঞামা মেনতে আশ এ দহ আকাদা।
ডঃ হেম্ব্রমাঃ কাথারে জুয়ৗন অনলিয়ৗ যৗসতি লেকা অলবেল তালাতে লাহা হিজুঃ হুয়ুঃ তাকোওয়া। জুয়ৗন কো লেবড়েজ লেনখান বাং হুয়ুঃ আ। জুয়ৗন কোগে তায়নম দারাম অনলিয়ৗকো হর ডাহার উদুঃ আকোওয়া। সাঁওতা লিলিবিছি তাঁহেনমা নওয়াগে জুয়ৗন অনলিয়ৗ কুরুমুটুয়মা। মানতান মৗঝি গংকেয়াঃ লৗইরে বুটৗয়েনা অনলিয়ৗআঃ জিয়ন কাথা সাঁওতে উছৗন আকান পুঁথি পতব করেনা অড়েঅড়পাৎ গালচ। সানতাড় এলেখা রেগে কলকারখানা প্রজেক্ট বেনাও কৗমিহরা সাবঃ কানা। আমদ আদিবৗসি তাঁহেনাম অকারে ? জুওয়ৗন কো নওয়া বাক ঞেল খান হাপেন দিন আডি বৗড়িচ হুয় চালাঃআ। নওয়া কো বিরুধ তিগু রুখিয়ৗ এসকার তেদ বাং হুয়ুঃ আ। জুমিৎ লৗকতি মেনাঃ আকাদা। এড়ে অচোঃ কানাবন লাফাং সিখনৗৎ অভাবতে। আবোওয়াঃ দাম দ এনেচ লৗগিৎ টাকা খৗজৗড়ি এমকাতে ইদি বনা। ঞেলঃ কান এটকে টড়ে করে জুয়ৗন অনলিয়ৗ কো যৗসতি অল পাসনাও লৗকতি মেনাঃআ, মৗনমি যাতে চেঁঘাও মাকো।
বাডায়মা শিখনৗৎ হড়গে সাঁওতায় লাহাকেয়া। অল পাসনাও কাতে লৗড়হৗই সালগাওরে জুয়ৗন অনলিয়ৗ কোওয়াঃ তারেনরে আঁগিভার তাঁহেয়েনা।
জুয়ৗন অনলিয়ৗরেন প্রেসিডেন্ট মানতান গনেশ মারানডি আখড়া মুচৗৎরে সারহাওনা চাল কাতে আরদাশে দহকেদা যে ,'নওয়া আয়োদিয়ৗ বানচাও লৗগিৎতে জুয়ৗন অনলিয়ৗকো কলম সাব তাবনপে। আদিবৗসি কোওয়াঃ অৗইদৗর বানচাও ইদি কাতে কলম ব সাবমা। '
.webp)
.webp)
