আবোওয়াঃ ডিজিটাল ডেস্ক- ২২ ডিসেম্বর দ সানতাড়ি পৗরশি মাহা। তেহেঞ ঞিদৗ আঁগালেনখান গে সানতাড়ি পৗরশি মাহা আরহঁ মিৎ সেরমায় লেবেদা। নোওয়া মাহা হিলোঃ আতো অড়াঃ খন এহব কাতে শাহার বাজার আয়মা ঠেন গে আয়মা ক্লাব, গাঁওতা, স্কুল, কলেজ এমান কঁহ হুডিঞ মারাং আখড়া তালাতে আডি রৗস্কৗ সালাঃ কো মানাও আ। সানতাড়ি পৗরশি মাহাদ আডি রৗস্কৗ আর গরবান মাহা কানা। অনাতে আয়মা হড়গে নোওয়া মাহারেনাঃ মানাওয়ঃ কান আখড়া করে সেনেলেদ্ কো ঞেলঃ আ।
মেনখান নঁতে সানতাড়ি পৗরশি সংবিধান স্বীকৃতি ঞাম কাতে নুনৗ সেরমা হুয়েন রেহঁ আয়মা স্কুল রে সানতাড়ি বাং চৗলু আকানা। পছিম বাংলা রে মিৎ বার জায়গারে চৗলু আকান রেহঁ ঝাড়খন্ড, বিহার, উড়িষ্যা রেদ অনকা হঁ বাং লাহা আকানা। অনা করে মিৎ বার কলেজ ইউনিভার্সিটি মেনাঃ রেহঁ কোন রকম তে চালাঃ কানা। অকারে মাচেৎ বৗনুঃ আকাৎ কোওয়া,অকাকরেদ পরিকাঠামো বৗনুঃ আকাদা, অকাকরেদ টেক্সট বই বৗনুঃ আকাদা- নংকান অভিযোগ গে ঘানে ঘানে রাকাব হিজুঃ কানা।
অনকাগে আরহঁ পছিম বাংলারে ২০১২ সালরে সানতাড়ি পৗরশি অফিসিয়াল ল্যাঙ্গুয়েজ হোয় আকানা। যাঁহা আইন রেনাঃ ঞুতুম দ- 3B West Bengal Official Language 2nd Amendment Act,2012. বাডায় আকানা নোওয়া আইন লেকাতে বাংমা পছিম বাংলা রেয়াঃ যাঁহা টঠা সে ব্লক, সাবডিভিশনরে ২০১১ রেনাঃ সেন্সাস রিপোর্ট হিসৗবতে ১০% অনা পারশিরেন হড় মেনাঃ আকাৎ কোওয়া, অঁডেগে সরকারি কৗমিরে নোওয়া পৗরশি অফিসিয়াল ল্যাঙ্গুয়েজ লেকাতে বেওহারঃ আ।
নোওয়া আইন সে বিল হুয় তায়ম নোটিফিকেশন হুয় আকানা যাঁহাদ কোলকাতা গেজেট রে ছাপাও আকানা সাঁওতে সানাম জেলারেন ডি.এম. কঁহ চিঠি হুয় আকানা। মেনখান ঞেল ঞেলতে তেহেঞ ৯ সেরমা পারমঃ কানা, এনহঁ পছিম বাংলারেনাঃ অকারেহঁ সানতাড়ি পৗরশি অফিসিয়াল ল্যাঙ্গুয়েজ বাং চৗলু আকানা।
মেনখান নোওয়া কো ইদিকাতেৎ অকয় নেতা, মন্ত্রী সে গাঁওতা, সংগঠন চিলিহঁ বাংকো রড় এদা। পৗরশি মাহাদ সেরমা কে সেরমা ভৗরি ভরম সালাঃ সে আডি রৗস্কৗ সালাঃ মানাওয়ঃ কানা মেনখান অফিসিয়াল ল্যাঙ্গুয়েজ রেনাঃ কাথা দ অকয়হঁ বাংকো ঞুমা। লৗই লেগ কানা নোওয়া লৗইতেদ সানাম গে থিরথার। কুকলি রাকাব দাড়েয়াঃ আ পৗরশি মাহা মানাও সুমুং তেগে হাপেন সানতাড়ি পৗরশি জিয়ৗও তাঁহেনাতো ? যাঁহারে সানতাড়ি পৗরশি কৗমিরেগে বাং জওয়াঃ কানা।
.webp)
