(হুডিঞ কৗহ্নি)
মজ্ গড়মবা
বাড়তাং সরেন
সিধু, লেটে, ঢিবৗ, সিরৗম আর কুড়বী তাকো দিনৗম হিলঃ লেকাগে চাম্পা গাড় রেনাঃ পৗচরী দুওয়ৗর সামাংরেকো সেটেরেনা। সানাম হড়াঃ তিরে মিৎ থপা কাতেঃ গুলৗচবাহা। সানাম কো আডি আঁশতে মিৎ মনেতে চাম্পা গাড়রেনাঃ পৗচরী দুওয়ৗর সেচকো কয়ঃ আকাদা। ওনকোওয়াঃ মনেদয় মেন আ -- নিতগে পাশেচ অনা গাড় দুওয়ৗর ঝিঝোঃ আ, আর লান্দা লান্দাতে মজ্ গড়মবা ওডোং হেচ কাতেঃ সানাম হড় লৗডুয় এম চাল আকোওয়া আর চেরেচ চেরেচতে বানাম আতে দুলৗড় সেরেঞ এ আঁজম আকোওয়া। মেনখান, সিঞ চাঁদোয় কচেয়েন রেহঁ অনা চাম্পা গাড় রেনাঃ দুওয়ৗর দ বাং ঝিঝ্ লেনা। ওনকো গিদরৗকো দ অনা আগুতরা লেৎ বাহা গাড় দুওয়ৗর সামাংরে কো দহ কেদা আর আডি মিরলুং আতে মায়াঃ মুয়ুঃ আপান আপিন অড়াঃকো রুওয়ৗড় সেন এনা।
সুসৗর হাড়াম মেলেটারি কৗমি খন জিরৗও কাতেঃ আয়াঃ কুকমু লেকাগে আপনারাঃ আতো দিশমরে মারে অড়াঃ তায়ম নাখা মারাং মারাং বাখোলে তেয়ার কেদা। আর বেড়হায়তে আডি মারাং পৗচরীয় তেয়ার রাকাপ কেদা। সেদায় মারে অড়াঃ দ বায় রৗপুৎ লেদা, চেদাঃসে অনা অড়াঃরে সরগপুরীরে হেনাঃকিন গ- বাবা তৗকিনাঃ দুলৗড় আশিষ আর থুম জপড়াও হেনাঃ আ। পৗচরী ভিতরীরে নানা হুনৗর বাহা দারে আর উল,খান্টাড় লেকান নানা পারকান জ-বিলি দারে হঁয় রহয় আকাদা। অনা পৗচরী ভিতরীরেনাঃ দারে ডৗররে নানা হুনৗর চেঁড়েকো তুকৗ আকাদা। তুকৗরে চেঁড়েকো হপনঃ আ, আর হারা কাতে এঁগা হপন মজগেকো সেরেঞা অনা বাগান তালারে। সুসৗর হাড়াম দ আডি দুলৗড়তে অনা বাখোলরেনাঃ ঞুতুমে দহ আকাদা ' চাম্পা গাড়'।
সুসৗর হাড়াম দ আচ মত গে অনা চাম্পা গাড়রেয় তাঁহেনা। আচরেন বুড়হী দ গেল সেরমা লাহারেয় হানা পুরী আকানা। আচরেন কড়া কুড়ি দকো হারাবুরু আকানা। সানাম শহর বাজাররেকো তাঁহেনা। সুসৗর হাড়ামরেন গাতে দ চেঁড়েঁ চুপড়ী আর আতোরেন ওনকো হুডিঞ হুডিঞ বাবু বিটি তাকোগে।
সুসৗর হাড়াম দ দিনৗম হিলঃ সেতাঃরে শহর বাজারতেয় সেনঃ আ আচরেন গড়ম কড়া কুড়িতাকো সাঁও ঞাপাম লৗ গিৎ। তিকিন আচুর যখন চাম্পাগাড় তেয় রুওয়ৗড়া, উন দ আয়াঃ বাখোল রাচারে সানাম গিদরৗ বাহা আতেকো সেটের হাতাড় কঃআ। চেঁড়ে চুপড়ী কোয়াঃ সেরেঞ আর গিদরৗ কওয়াঃ রড় লান্দাতে চাম্পাগাড় দ সৗরিগে সৗরি চাম্পা গাড় লেকাগে বুজুঃআ। সুসৗর হাড়ামে সেটের লেনখান সানাম গিদরৗকো উনি ঠেনকো ঞির সুরুঃআ আডি রৗ স্কৗ আতে।
সুসৗর হাড়াম দ মিৎ মিৎতে থৗয়লৗঃ খন লৗডুয় ওডোকা আর সিরৗম, কুড়বী, লদ তাকোয় হৗটিঞ আকোওয়া। লৗ ডুকো জম বাড়া কাতে গিদরৗকো মেনা ---মজ্ গড়মবা, তেহেঞ দ পৗহিলরে সেরেঞ আঁজম আলেমে, অনা তায়ম পাড়হাঃ এম সেঁড়া আলেয়া। সুসৗর হাড়াম দ অনা বীরকচা আতোরেন সানাম গিদরৗ কোরেন 'মজ্ গড়মবা'। আদ মজ্ গড়মবা জাগে দাঃ ঞুঁ জিরৗও কাতেঃ কিঁদিরি বানাম আতে সেরেঞে এহবা আর গিদরৗকো দ সানাম থায়ো থায়োতে উনি সাঁও বহঃ হিলৗও হিলৗও তেকো সেরেঞা। নংকাগে দিনৗম হিলঃ জম, কাতেঃ ঞুঁ, অলঃপাড়হাও আর সেরেঞ আতে দিন দ পারম চালাঃআ। মজ্ গড়মবা দ ধৗরতীরেনাঃ সানাম সুক আয়াঃ বাখোল রাচারে বিদলৗয় আকান লেকায় বুজৗ।
মিৎদিন আচকাগে সানাম গিদরৗ সেন কাতেঃকো ঞেল কেদা, চাম্পাগাড় রেনাঃ দুওয়ৗর সিঞ গেয়া। হুডিঞ হুডিঞ লৗবিৎ তিতে দুওয়ৗর কাপাট অর ঝিঝরেনাঃ কো রিকৗ কেদা। মেনখান বাংকো ঝিঝ দাড়েয়াদা। হান্তে নাতে খন গোটাকো উয়ুং আচুর কেদা। মেনখান অকা সেচ লেকাতেগে চাম্পা গাড় ভিতরীতে বাংকো বলো দাড়েয়াদা। আয়ুপ হৗবিচ বাহা আতে অনা চাম্পা গাড়রেনাঃ দুওয়ৗর রেগেকো দুড়ুপ তাঁহেয়েনা। সিঞ চাঁদোয় হাঁসুরেন খান গিদরৗ কোরেন আয়োবাবা গিদরৗ পাঁজাকো হেচ এনা। উনহঁ সানাম গিদরৗ মেৎরে মেৎদাঃ আর বাহা হবর কাতে অণ্ডেগেকো দুড়ুপ থির আকানা।
অনা তায়ম দিনৗম হিলঃ ওনকো গিদরৗ দ অনা চাম্পাগাড় রেনাঃ দুওয়ৗর সামাং রেকো হিজুঃ আ থপা থপা গুলৗচ বাহা আতে। সারাদিন তাঁহে কাতেঃ দুওয়ৗর সামাংরে বাহা দহ ওটৌ কাতেঃ মেৎরে মেৎদাঃ আতেকো রুওয়ৗ ড় সেনঃ আ। মেনখান মজ গড়মবাওয়াঃ কাথা দ অকয় হঁ বাংকো লৗই দাড়েয়াদা।
বার গেল মড়ে মাহা তায়ম, দিনৗম হিলঃ লেকাগে সানাম গিদরৗ কো দুড়ুপ আকানা বাহা হবর কাতেঃ অনা গাড় দুওয়ৗর সামাংরে। আচকাগে চাম্পাগাড় সামাংরে মিৎ মারাং উতৗর এম্বুলেন্স গৗডি তিঙ্গুয়েনা। বতরতে সানাম গিদরৗ কো ঞির বেরেৎ এনা। দৗদৗড়কো এহপঃকান তাঁহেনা। উন অক্তেগে দুওয়ৗর ঝিঝ্ কাতেঃ এম্বুলেন্স গৗডি খন মিৎ হড় বৗই বৗইতেয় ফেড এনা। রিসরিসি জেলেঞ ধারসাদালে বহঃ উপ্। গিদরৗকো ঞেলতে বার মেৎখন টড়ঃ টড়ঃ মেৎদা জরয়েন তায়া। ওনকো সেচ কয়ঃকাতে বার তিয়ে লাহাকেদা। গিদরৗকো ঞেল ঠৗওকৗ কেদেয়া উনি হড়। ওনকো দ রাঃ রাঃতে ' মজ্ গড়মবা', 'মজ্ গড়মবা ' হহ আতে উনি ঠেনকো ঞির চালাও এনা। মজ্ গড়মবা দ লাহা চালাও কাতেঃ সানামে হবর রাকাপ কেৎ কওয়া। সানাম হাড়ুপকাতেঃ রাঃ রাঃতেয় মেন কেদা- --আপেয়াঃ দুলৗড় ঠেন 'আজার' দয় হারাও আকানা গড়ম, আপেয়া দুলৗড়গেয় জিৎকৗর আকানা, আদ তিসহঁ বৗঞ বৗগি আপেয়া, তিস হঁ বাং !!
.webp)
.webp)
