অনড়হিঁয়ৗ ঠাকুর প্রসাদ মুরমু
মহাদেব হাঁসদা
নাহাঃ সানতালি সাঁওহেৎ রেন আডি ঞুতুমান মিৎ অনড়হিঁয়ৗ দ কানায় ঠাকুর প্রসাদ মুরমু। উনিয়াঃ জানাম মাহাদ ১৯৩১ সাল রেয়াঃ ২ জানুয়ারি সিংভূম জেলা রেয়াঃ পটকা থানারে মেনাঃ লওয়াডি আতোরে হোয় লেনা। আচ বাবা আঃ ঞুতুম দ ছোটরায় মুরমু আর আয়ো আঃ ঞুতুম দ রুক্মিনী হাঁসদা।
ঠাকুর প্রসাদ আচ্ বাবা দ জামসেদপুর রেয়াঃ TISCO রেয় কৗমি কান তাঁহেনা। চাষী লেকাতেহঁ উনিদ কিঁষৗড় হড়ে এ তাঁহেকানা। মেনখান হিরম সিকিড় বায় সাহাও দাড়েয়াৎ তে আচ্ আয়ো দ ঠাকুর প্রসাদ সাঁওতে কাতে আপাবারে অড়াঃ দিউয়ি তেয় রুওয়ৗড় হেচ্ এনা।
মামাতেকো হঁ আডি কিঁষৗড় হড় কো তাঁহেকানা। সমাজরে ওনকোওয়াঃ মৗন-ভরম হঁ আডি চেতান রে তাঁহেকান তাকোওয়া। অনা লেকারে, ঠাকুর প্রসাদ দ অনডে গে অলঃ পাড়হাঃ এ এহপ্ এনা। আতো ইস্কুল খন অডোং কাতে মহুলিয়া মিডিল ইংলিশ ইস্কুল (M.E.) রে এয়ায় কিলৗস হৗবিচ্ এ পাড়হাও কেদা। অনা তায়ম গালুডি জগদীশ চন্দ্র হাই স্কুল খন মেট্রিক (১৯৪৭) বিডৗউ এ পাস কেদা। নংকা কাতে রাঁচি গভঃ ডিগ্রী কলেজ খন আই.এ. আর বি.এ. (অনার্স) হঁ ১৯৫১ সাল রেয় পাড়হাও পুরৗউ কেদা।
অনাকাতে ঠাকুর প্রসাদ মুরমু দ বার সেরমা গান গালুডি কানাই লাল নন্দী হাই স্কুল রে চেচেৎ ইচ্ লেকাতে কৗ মিরেয় বাহাল লেনা। মেনখান ১৯৫৩ সালরে অনা কৗমি বৗগি কাতে এ.জি.অফিস, রাঁচি রেয় বাহাল এনা আর ১৯৮৯ সাল রে কৗমি খনে জিরৗউ লেন তাঁহেনা।
তেসার কিলৗস রে পাড়হাঃ বিদৗল খনগে ঠাকুর প্রসাদ দ সানতালি সাঁওহেৎ চারচা রেয় ফেড লেনা। আয়াঃ পৗহিল উতৗরাঃ অল দ তাঁহেকানা মিৎটেন হুডিঞ গায়ান, ঞুতুম দ- “লিপি ঠৗকরা”। অনা তায়ম সেরেঞ, অনড়হেঁ, কৗহনি, অনল অ-অলরে জিওয়েৎ ভোর মনে-জিউয়িয় আলায় লেদা। আচ্ অলাঃ পুঁথিকো দ হোয়োঃ কানা- ১। এভেন আড়াং (১৯৪৭),২। সিসিরজন রাড় (২০০৩),৩। অনড়হেঁ সঁধায়নি (২০০৬) ৪। আরাঃ গুলৗচি (২০১৫), ৫। নাহাঃ কৗহ্নি, কুদুম, আর অনল কো (২০১৫)। নওয়াকো পুঁথি রেদ ৫০০ গান অনডহেঁ আর আয়মা সেরেঞ, অনল, কৗহ্নি, কুদুম এমান মেনাঃ আকাদা। নওয়া বেগর উনিয়াঃ আয়মা অনল কো বিন ছাপাগে তাঁহে আকানা।
নুয় মারাং অনড়হিঁয়ৗ ঠাকুর প্রসাদ মুরমু তেহেঞ আবো তালারে বৗনুগেয়া। পারমেন ২০১৮ সাল রেয়াঃ ২ অক্টোবর উনিদ নওয়া ধুড়ি ধৗরতি বৗগি কাতে জায়জুগ লৗগিৎ হানাপুরিতেয় সেন আকানা। মেনখান সানতালি সাঁওহেৎ রেয়াঃ নাগামরে উনিয়াঃ ঞুতুম দ ডাগ্ ডাগ্ সোনা আখরতে অল তাঁহেনা।
.webp)
.webp)
