ইঞদ মেনাঞ তাঁগিরে

(হুডিঞ মাছা কৗহনি)

ইঞদ মেনাঞ তাঁগিরে

প্রফেসর শশীকান্ত মুরমু

 লালগড় আতুরেন ছিতৗমুনি সরেন । অৗডিগেয় রেঙ্গেচআ । বয়সহঃ অৗডিগানগে  হুয় আকানতায়া । এন্তেরেহঁ দিনৗমগে সেতাঃ আকানসে ঠেঁঙ্গা  তিরুব তিরুবতে কুলহি পিন্ডৗরে সেনকাতেঃ এ দুড়ুবকঃআ । তিরে সারজম খালাঃরে সাব কাঃ আয় মাতকম লাঠে । বাং আচরেন গিদরৗ কানু  সরেন লৗগিৎ দ বাং । ছিতৗমুনিয় বাড়ায়া কুনুদঃ  আদ তিসগে বায় রুয়াড়া।

উনিদ সান্তাড় সাঁওতারেন রেঙ্গেচ নাচার মৗনমী উৎনৗও আর হারখেত শাসেত সাহায় লৗগিৎ , যায়যুগ লেকায় আৎ আকানা । নিতহঃ ছিতৗমুনি দিশৗয় গেয়া এন হিলোআঃ কাথা । বেটা কানু  কিদুপ্‌ জম এ দুড়ুব আকানা । এনে গে বার পে লাপেত দাঃ , মৗড়িয় জম আকাদা । আচ্‌কাগে বারগেল গটেন পুলিশকঃ দৗড় বলয়েনা । থৗরি লেবেৎ গিডি কাতেৎ  যত হড়তে দাল দালতে কানুক অর ইদিয়ে কানা । ছিতৗমুনি রাঃ রাঃ তে বড়বাবুওয়া জাঙ্গারে সাব কাতেৎ এ  মেতাদেয়া চেদাঃপে দালেকান তিঞৗ গিদরৗদ ? চেৎ এ কৗই আকাদা ? বড়বাবু ছিতৗমুনি কলসাঃ অচঃ কাতেয় মেন লেদা,মূরুখ সান্তাড়, রাজঃ রেনাঃ কুকমুপে ঞেল এদা । ইদি কিদিয়াকো কানু । আদ বায় রুয়ৌড় লেনা । মেনখান ছিতৗ মুনি দিনৗমগে হরসেন কয়ঃ কাতেঃ তাঁঙ্গিরেয় তাঁহেনা ।

নওয়া হারখেত শাসেৎতে পেরেচ আকান সান্তাড় সাঁওতা , জৗতি আর ধরম বাঁঞ্চাও লৗগিত যাঁহায় মৗনমি যদি যাঁহা তিস নওয়া হরতেয় পারমঃআ , এন্তেখান নওয়া খালাঃ মাতকম লাঠেয় সাব আয়া । আর এ মেতায়া বাবু তাড়াম ডাহাররেম লাঙ্গা  লেনখান , রেঁগেজ মেখান নওয়াম জমা ।

গেলবার সের্মা পারম এনাঃ । ছিতৗমুনিয়ৗঃ  বয়সহঁ অৗডিগে বৗড়তি য়েনা। হড়মরে দাড়েহঁ কম এন তায়া। এন্তেরেহঃছিতৗমুনিয়ৗ  মনে রেনাঃ  দাড়েদঃ বাং  রৗপুত লেন তায়া । দিনৗম সেতাঃ আকানসে পটম মাতকম লাঠে সাব কাতে, ঠেঙ্গা  তিরুপ  তিরুপতেয়  উডুকঃ গেয়া কুলহি পিন্ডৗরে । কুলি লেখান এ লৗইআ বাবু , বাড়ায়াঞ আয়মা দিন পারম এনা । সরকার হঁয় বদল এনা । মেনখান সৗরি গেকি আবো সান্তাড় আঃ  দুক্‌ হারখেৎ সানাম মুচৗৎ আকানা ?

তিনৗ  রাজ অৗরিরেন নেতা ,সাঁওতা সুসৗরিয়ৗ , পৗরশি পারুখিয়ৗ , অনলিয়ৗ নওয়া হর তেক পারমেনা । মেনখান সৗরিগে অন্তর মনে জীউয়ি খন সাঁওতা সুসৗর লৗগিৎ লাহাও আকানায় , অনকান মৗনমিদ অৗউরিঞ ঞেল ঞাম কোওয়া । এন্‌তেরেহঁ পৗতিয়ৗও মেনাঃ তিঞৗ, আবো সান্তাড়  সাঁওতা আর মৗনমি উৎনৗও লৗগিৎ , কানু সরেন লেকা যাঁহায়দ বাং যাঁহায় , মিৎদিন নওয়া হরতেয় হিজুঃ গেয়া । ইঞদ মিনৗঞৗ উনিয়ৗ তাঁঙ্গি  তাঁড়াঃরে ।